 Este vindeiro sábado 27 de novembro na Coruña terá lugar a Asemblea Xeral de ADEGA. Será a 35 Asemblea Xeral que celebra ADEGA dende 1975, e desta volta estará organizada pola delegación d'A Coruña. O lugar será o Centro Cívico dos Mallos (Avda. de Arteixo 147, bx.). Arestora en Galiza estase a consolidar unha involución ambiental sen precedentes da man da crise e do capitalismo depredador que ameaza mesmo á esencia da nosa identidade: o territorio. O ecoloxismo e a sociedade debemos facer fronte a este desafío con intelixencia e valentía e reclamar unha xestión do noso territorio, o recurso non renovábel máis valioso, centrada na conservación e uso sustentábel dos seus valores fronte á depredación, a mercantilización ambiental e o lucro desmedido. |
|
Ler máis...
|
|
 O vindeiro domingo 28 de novembro ADEGA Lugo pretende lembrar a obra literaria do poeta Fiz Vergara Vilariño e a súa persoa cun roteiro polo Val de Lóuzara (Samos), ao que o poeta alude reiteradamente na súa obra e no que se concentra unha grande riqueza ambiental e sociocultural, como veremos. Nesta andaina acompañaranos a Asociación Cultural Ergueitos, que está a realizar un interesante e importante labor a prol da figura de Fiz Vergara. Este roteiro enmárcase dentro do ciclo de roteiros de ADEGA dedicado á lingua galega. Podes descargar o plano da ruta nesta LIGAZÓN. |
|
Ler máis...
|
 Toques, 16 de novembro de 2010. Voluntari@s de ADEGA e as asociacións do Foro do Camiño Primitivo promoven este sábado día 20 dunha actividade de campo consistente na recuperación e sinalización dun treito da calzada histórica do Camiño de Santiago no Concello de Toques (A Coruña). A xornada completarase coa visita á Aula da Natureza de Souto, un roteiro polo Marco do Careón, através do Camiño Primitivo e un magosto na Eira da Xoana. Podedes baixar a  Programación da Xornada (PDF 432 Kb) á que vos convidamos a participar, xunto co cartaz informativo. |
|
Ler máis...
|
 O pasado 25 de outubro de creouse no Pindo a Asociación Monte Pindo Parque Natural para promover a consecución desta figura de protección para este sobranceiro espazo natural. A AMPPN foi fundada por persoas que representan ás parroquias veciñas do Monte Pindo, ademais de colectivos ecoloxistas como ADEGA, promotora da idea. É portanto unha asociación composta maioritariamente por veciños e veciñas orgullos@s do seu patrimonio natural e cultural, que pretenden poñelo en valor para compatibilizar o aproveitamento económico sustentábel coa protección ambiental dos seus grandes valores biolóxicos, xeolóxicos e patrimoniais. Con estes obxectivos convocámosvos ao acto de apresentación que terá lugar este sábado 13 de novembro no Salón de Actos do Concello de Carnota.
|
|
Ler máis...
|
 Lugo, 8 de novembro de 2010. A Confederación Hidrográfica Miño-Sil e a Xunta aínda non tomaron medidas para frear a expansión dunha especie invasora, o cangrexo vermello americano, na Lagoa de Riocaldo (Begonte), apesar de recibir xa hai dous meses a denuncia de ADEGA e o apoio a esta denuncia do INLUDES (Instituto Lucense de Desenvolvemento) . A proliferación desta especie, que afecta a un Lugar de Interese Comunitario, zona de Rede Natura e Reserva da Biosfera, agravouse desde que a empresa ERIMSA abriu unha canle de evacuación de auga fóra da lagoa para a extracción de áridos.
|
|
Ler máis...
|
|
 A Coruña, 22 de novembro de 2010. A denuncia interposta pola asociación veciñal O Noso Burgo, A Confraría d'A Coruña e ADEGA pola ampliación de Alvedro foi admitida a trámite pola fiscalía especializada en asuntos medioambientais do TSXG. Os colectivos denunciantes vímonos na obriga de acudir á xustiza debido ao estado de indefensión no que ficamos fronte a administración, que nen sequera molestouse en contestar ás alegacións feitas fai xa case dous anos. A denuncia fai especial fincapé no feito de que o Ministerio de Medio Ambiente tivera que pedirlle até tres veces unha verdadeira xustificación da obra ao promotor, neste caso AENA, que alén de non dar resposta, aprobou finalmente o proxecto.
|
|
Ler máis...
|
 Caldas, 15 novembro do 2010. A Consellería de Medio Ambiente vén de anunciar unha serie de medidas para acabar coa proliferación explosiva de cianobacterias no encoro d'A Baxe, no Umia, entre as que están a experimentación con balas de palla; o investimento de 350.000€ para "elimirar pola vía de urxencia” dúas construcións “abandonadas”; a declaración da bacía como zona sensíbel e a elaboración dun Plano de Xestión Integral da bacía do Umia. Ante tais propostas queremos lembrarlle ao Sr. Conselleiro que non debera facer falla ter problemas no encoro para elaborar un Plano de Xestión Integral do río: é unha obriga da Directiva Marco da Auga e da Lei 5/2006 para a protección, a conservación e a mellora dos ríos galegos. Mais outra volta, e contra toda legalidade e sentido común, Hernández non só quere poñer o negocio dos amigos por diante da salubridade cidadá senón que pretende salvar os beneficios hidroeléctricos do Sr. Cortizo á conta dos fondos públicos. |
|
Ler máis...
|
 9 de novembro de 2010. Fai 35 anos que os españois abandonaron aos saharauís permitindo a ocupación ilegal do seu territorio por Marrocos. Dende entón, Marrocos cometeu todo tipo de abusos contra o pobo saharauí: incumpriu todas as resolucións da ONU que instan á celebración dun referendo de autodeterminación, torturou, marxinou e expulsou aos habitantes da súa terra, espoliou os seus recursos naturais, levantou un muro de 2.500 Km. sementado de minas separando a milleiros de familias, e blindouse para que nin observadores de dereitos humanos, nin medios de comunicación, nin outros colectivos, puideran ser testemuñas da represión. ADEGA súmase á denuncia pola gravidade dos acontecimientos que están a acontecer nos territorios ocupados do Sáhara Occidental pola represión de Marrocos e transmite a súa solidariedade ao pobo saharauí. Acode ás concentracións de protesta deste martes 9! |
|
Ler máis...
|
 Redondela, 8 de novembro de 2010. ADEGA participou nas XI Xornadas Estatais en Defensa do Ferrocarril Público e Social, celebradas esta edición na vila de Redondela entre o 5 e 7 de novembro, xunto con outros colectivos integrados na Plataforma Salva O Tren e a Plataforma Estatal pola Defensa do Ferrocarril. No decurso destas xornadas ficou patente a preocupación existente en todo o estado polo desmantelamento sistemático das liñas de ferrocarril tradicionais en beneficio do AVE. Trátase dun medio de transporte que, se ben emite menos gases de efecto invernadoiro, resulta un medio caro e esixe infraestruturas de grande impacto ambiental, polo que o aforro en polución non é tan claro. O AVE non debe ser incompatíbel co tren clásico, o cal presta servizo a inúmeros núcleos de poboación de Galiza. Podes baixar o relatorio de ADEGA nestas xornadas premendo nesta Ligazón. |
|
Ler máis...
|
|
|
|
|
<< Inicio < Anterior 41 42 43 44 45 46 47 48 49 50 Seguinte > Final >>
|
|
Páxina 49 de 64 |
Subscribir a fonte RSS