O vindeiro domingo 28 de novembro ADEGA Lugo pretende lembrar a obra literaria do poeta Fiz Vergara Vilariño e a súa persoa cun roteiro polo Val de Lóuzara (Samos), ao que o poeta alude reiteradamente na súa obra e no que se concentra unha grande riqueza ambiental e sociocultural, como veremos. Nesta andaina acompañaranos a Asociación Cultural Ergueitos, que está a realizar un interesante e importante labor a prol da figura de Fiz Vergara.  Este roteiro enmárcase dentro do ciclo de roteiros de ADEGA dedicado á lingua galega. Podes descargar o plano da ruta nesta LIGAZÓN.

Como sabedes, ADEGA Lugo dedica o seu programa de roteiros para este curso 2010-2011 á lingua galega como principal eixo de conexión patrimonial e cultural entre os galegos e galegas, xunto coa paisaxe e o territorio de Galiza. O obxectivo é recoñecer e potenciar a lingua propia como vehículo de vida e de entendemento ou interpretación do medio que nos rodea, para non deixar esmorecer o que constitúe o principal elemento da nosa identidade.

Con este vindeiro roteiro polo Val de Lóuzara achegarémonos a esa paisaxe do Lugo interior e á persoa de Fiz Vergara Vilariño que, aínda que estivo afectado parte da súa curta vida por unha enfermidade, deixounos unha fecunda obra literaria. Esta ruta literaria foi promovida pola Asociación Cultural Ergueitos co fin de honrar a obra de Fiz Vergara. Ten ademais a singularidade de que ao longo do traxecto foron colocadas 13 obras escultóricas de diferentes autores (Paco Pestana, Álvaro de la Vega, Mónica Alonso, entre outros) que fan referencia  á obra ou a aspectos da vida do poeta.

O punto de partida da ruta é o alto de Aira Padrón. Dende alí poderemos contemplar a fermosa paisaxe que Fiz Vergara recolle nos seus poemas:” Atravesando Aira Padrón / a calquera hora / vense fanegas de xesteiras / e uceiros e carrascos...”. O roteiro continúa cara á casa natal do poeta, na localidade de Santalla de Abaixo. Neste tramo final camiñaremos por unha fermosa senda e deterémonos a contemplar a fervenza de Augadalte e a Fonte da Cova, aludida tamén na obra de Fiz : “Esta fonte da Cova garuleira... en cada golforón dime por que existo / por que estou aquí / xunto ao vello muíño / agardándote...”.

O roteiro é de 8 km aprox  e de dificultade baixa. Parte do mesmo discorre por estradas secundarias, polo que se propón levar o chaleco do coche.

PREZOS:

PRÓXIMOS ROTEIROS: