11 de maio de 2010. O uso masivo de herbicidas para "limpar" as beiras das estradas increméntase coa crise. Desta volta, na N-550 entre Compostela e A Coruña vertéronse toneladas de herbicidas. A vexetación aparece sospeitosamente seca á beira da estrada e mesmo nos viais de servizo a carón de casas e leiras. Estas práticas, anque legais, comportan serios riscos para a saúde dos ecosistemas e non eliminan o risco de lumes: increméntano pola cantidade de mato seco que fica nas cunetas. Ademais, a chuvia arrastra os químicos que contaminan a terra e os acuíferos penetrando nas cadeas tróficas. Curiosamente, matas da herba da Pampa (Cortaderia selloana) e outras invasoras moi dificiles de erradicar, sobreviven ao fumigado. No ano da biodiversidade, ADEGA recomenda substituir o uso de biocidas para o control da vexetación por rozas mecánicas selectivas, que ademais respecten as frondosas autóctonas, verdadeiros cortalumes naturais.

Este xoves, membros de ADEGA, A. M. Augas Limpas, SGHN e Verdegaia, en representación dos 16 colectivos contrarios á instalación dunha mina a ceo aberto nas Fragas do Eume, trasladámoslle á Fiscalía as irregularidades observadas na tramitación deste proxecto. O Fiscal, Álvaro García Ortiz, acordou abrir dilixencias preprocesais para investigar as actuacións da administración neste caso e pedirlle máis información. A tramitación da mina de andalucita é outro exemplo do proceder chafalleiro e do desleixo da admnistración pola conservación do noso patrimonio natural: non se respectaron os prazos establecidos pola lexislación e o EIA presentaba escandalosas omisións, como non detallar os impactos da mina sobre o Parque Natural das Fragas do Eume, entre outras.

3 de maio de 2010. Varias queixas recibidas en ADEGA de usuarios/as e camiñantes alertan do preocupante estado do cabo Fisterra, chanzo final do Camiño. Roupa e plásticos abandonados, fogueiras ardendo e rochas renegridas, son o "tradicional" espectáculo que nos recibe ao chegar ao cabo do mundo. ADEGA chama a atención sobre os danos que estas práticas están a causar na paisaxe e no ambiente, alén do risco de incendio que supoñen as improvisadas cacharelas. Os distintos costumes para celebrar o remate do camiño non deberían degradar a contorna e supoñer un risco para o ambiente. Dende ADEGA propomos varias alternativas e pedimos maior implicación aos visitantes e administracións. Algunhas ideas para ambientalizar o teu camiño: Guía de BOAS PRACTICAS 1.80 Mb