27 de setembro de 2010. Un verán máis o subministro de auga de Caldas vese alterado pola mala calidade das augas do Umia. As causas están no encoro de Caldas, que outra volta tense convertido, debido á proliferación explosiva de cianobacterias, nunha sopa verde, cheirenta e tóxica imposíbel de depurar nin coas máis esixentes técnicas. Dacordo cos estudos da USC e da propia OMS, un exceso de Microcystis na auga é extremadamente perigoso para a saúde porque estas malia a seren destruidas, liberan unha cianotoxina -a microcistina- de efectos acumulativos, que ataca ao fígado, pode provocar problemas intestinais e neurolóxicos e mesmo funcionar como indutora ou desencadeante de tumores. Por iso, agora máis ca nunca ADEGA volta a pedir a demolición do encoro, única medida efectiva para garantir a saúde da poboación e a do río.
|
Ler máis...
|
Lugo, a 19 de setembro de 2010. Unhas 500 persoas e diversos colectivos, entre eles ADEGA, participaron este sábado no roteiro reivindicativo e na I Festa de Exaltación do Cemento de Barreiros, organizada pola plataforma “Máis talento, menos cemento”. Ambos os dous actos trataron de amosar a oposición dunha grande parte dos veciños da localidade costeira á política urbanística caótica e desatada do actual alcalde de Barreiros, Alfonso Fuente Parga, actualmente denunciado pola Fiscalía por un presunto de delicto de prevaricación urbanística.
|
Ler máis...
|
O colectivo "MAIS TALENTO E MENOS CEMENTO!" está a levar unha campaña por un urbanismo responsábel e denunciando as consecuencias da especulación salvaxe na costa, nomeadamente no concello de Barreiros. Este vindeiro sábado 18 de setembro convidámosche a unha xornada festiva coa "I festa de exaltación do cemento" en San Miguel de Reinante (Barreiros), e na que intervirán diversos grupos e artistas. Haberá pasarúas, música ao vivo e poroxectarase en exclusiva mundial o documental "Imaxina Barreiros". ADEGA apoia esta campaña e convídavos a colaborar na denuncia das falcatruadas sobre o territorio: se legalizan as barbaridades urbanísticas de Barreiros, entón xa valerá todo!
|
Ler máis...
|
10 de setembro de 2010. A consellería de Medio Rural permitirá batidas de xabarín dende abril até xaneiro para "combater" os perxuízos desta especie. Dez meses de caza ao ano e máis de 20.000 batidas autorizadas de antemán que non precisarán acreditar danos. Nisto consiste a “caza preventiva”, un vello anceio dos cazadores máis cavernícolas que agora Conservación da Natureza vén de asumir. Tal proposta, inédita en calquera política ambiental seria, vai expulsar ou poñer en grave risco a integridade de todas as persoas que non sendo cazadores, frecuentamos o monte. Tamén causará graves danos a outras especies de fauna salvaxe, incluidas especies protexidas, que non terán o sosego necesario para se reproducir, ou cuxas crías serán devoradas polas xaurías dos cazadores. Con medidas coma esta, os responsábeis de Conservación da Natureza certifican unha vez máis a súa incompetencia para xestionar a biodiversidade galega: son o raposo a ter conta do galiñeiro!
|
Ler máis...
|
|
20 de setembro de 2010. ROTEIRRÍOS é un programa de itinerarios organizado polo Proxecto Ríos que pretende unir ríos e persoas, achegando os cursos fluviais á cidadanía nun ambiente lúdico e dar a coñecer o seu patrimonio natural, cultural e social. A temática escollida para este ano é os ríos de montaña. O noso país acolle unha extensa rede fluvial de ríos e regatos de montaña moi ben conservados e cun grande valor ecolóxico. Nesta edición realizaremos un roteiro na fin de semana do 25-26 de setembro por Pena Trevinca, que ademáis coincide co Día Mundial dos Ríos (26-S)
|
Ler máis...
|
17 de setembro de 2010. A Xunta e o Estado "negocian" autorizarse mutuamente dúas obras de importante repercusión ambiental: por unha banda, a retirada da vella escolleira á entrada da ría de Noia que quere acometer Costas necesita da autorización de Portos de Galiza (Xunta) e por outra a macroponte de 1,4 km da variante de Noia, precisa do visto bo do ministerio. O viaduto de Hernández tería gravísimas repercusións ambientais e socioeconómicas na ría, espazo da Rede Natura 2000 e foco de produción marisqueira. De efetuarse este vergoñento troco de cromos (oficialmente "complicidade") Costas faríase cómplice da nefasta política territorial de Feijóo, e amosaría outra volta a escasa sensibilidade ambiental da Sra. Espinosa.
|
Ler máis...
|
13 de setembro de 2010. A política de dumping dalgunhas empresas leiteiras está a convertir o agro galego nun ermo. Esta estratexia vese favorecida pola falla de compromiso institucional para defender o noso sector agrogandeiro. Tras promover durante anos a intensivización, facilitar a concentración do mercado nunhas poucas mans, e ignorar as demandas dun grupo lácteo galego, a administración segue dando as costas ao agro, refén das transnacionais. En ADEGA coidamos que sen un mundo rural vivo, os desequilibrios ambientais agrávanse: despoboamento e abandono, cambio de usos e especulación, lumes... Resulta indecente que a Xunta siga a subvencionar a merca de coches, malia á constante caída das vendas, e a achantar o camiño á especulación urbanística e industrial, en troques de apoiar aos sectores produtivos baseados na terra que contribúen a manter vivo o mundo rural.
|
Ler máis...
|
Compostela, 7 de setembro de 2010. Profesores universitarios galegos, investigadores e representantes ecoloxistas apoian a proposta para a criazón do Parque Natural do Monte Pindo, que sería o sétimo existente en Galiza. O Monte Pindo apresenta 5 hábitats protexidos pola Directiva Europea 92/43/CE, 8 especies vexetais protexidas pola lexislación galega e 12 especies de fauna inseridas en distintos Libros Vermellos, segundo o documento revisado por Xavier Amigo, Profesor de Botánica da USC e Pedro Galán, Profesor de Zooloxía da UAC. Mentres a Xunta tenta rebaixar Corrubedo de parque natural a parque periurbano, abríndolle as portas á especulación, o mundo científico e os ecoloxistas apostamos pola conservación como motor do desenvolvemento sustentábel nas áreas protexidas.
|
Ler máis...
|
|