Primavera de 2013. A edición de primavera de CERNA adica grande parte dos seu contido á megaminaría contaminante na Galiza. A minaría en Galiza semella ter iniciado unha nova etapa na que resucita o interese polos recursos metálicos e preciosos. A busca dos chamados “minerais estratéxicos” non só está a supoñer unha avalancha de solicitudes por parte de multinacionais estranxeiras por todo o territorio galego, senón tamén o agromo dunha oposición social que rexeita esta nova forma de especulación e contaminación da nosa terra. Nesta CERNA 69, colectivos como ADEGA e a SGHN reflicten no caso de Corcoesto as consecuencias desta nova minaría para a saúde ambiental e humana. Neste número abórdanse tamén cuestións como a ILP a prol da reutilización e reciclaxe de residuos en Galiza, a contaminación electromagnética, a mobilidade en Pontevedra, os morcegos forestais como especies en perigo, e a importancia das pequenas charcas no medio natural. Destacamos o novo programa de voluntariado de ADEGA “Charcas con Vida”, que trata de resaltar e poñer en valor os humidais pequenos, imprescindíbeis para a biodiversidade galega. Descarrega a CERNA 69 (5,38 MB)

Dentro do conxunto de actividades organizadas por ADEGA na Campaña “Ponte no Medio, Móvete pólo Territorio” a prol dunha ordenación territorial sustentable, o vindeiro 4 de xuño desenvolverase na sala de conferencias do Edificio Multiusos de Melide unha xornada dedicada a analizar o papel do monte galego como oportunidade sostible fronte a crise. A actividade está programada conxuntamente coa ORGACCMM (Organización Galega de Comunidades de Montes Veciñais en Man Común) e conta co patrocinio de Vicepresidencia da Deputación da Coruña. Baixa o Programa (469 Kb) da actividade.

17 de maio, Día das Letras. MANIFESTO: PAREMOS OS ATAQUES CONTRA O GALEGO! As galegas e os galegos festexamos no Día das Letras o feito de termos un idioma propio, milenario e fértil. Celebramos a lingua que nos une; a fala que herdamos e queremos deixar en herdo; a escrita que nos pensa, nos canta e nos soña. Mais neste Día das Letras do ano 2011 non só podemos festexar e celebrar. Tamén nos vemos na necesidade de chamar a atención sobre os ataques que está a recibir nestes momentos o noso idioma. Estas inxustas agresións poñen en perigo o futuro da nosa lingua e da nosa cultura, ademais de debilitaren gravemente a convivencia e a cohesión social do país.

Este mércores 11 de maio instalouse unha nova área de compostaxe comunitaria no parque d'As Lagoas, no concello de Bueu, para tratar os residuos orgánicos dos veciños e veciñas do bairro e os restos de poda e sega dos parques. Con esta iniciativa a Mancomunidade do Morrazo e ADEGA pretendemos reducir a cantidade de residuos xerados, xestionalos no mesmo lugar onde se producen evitando o transporte e sensibilizar a poboación na reciclaxe de residuos así como implicala na resolución da problemática do lixo. Todo o contrario que a Xunta, que segue apostando pola incineración e vai reproducir o erro de SOGAMA cunha nova planta, ao parecer no concello de Dozón.

3 de maio de 2011. Os grupos ecoloxistas ERVA e ADEGA queremos denunciar ante a opinión pública a regresión en materia de política de xestión e conservación da fauna que supón, en primeiro lugar, a negativa da Xunta a compensar os danos do porco bravo e, en segundo lugar, o impulso da celebración de batidas para controlar a poboación desta especie en época de cría e mesmo dentro de zonas protexidas.