ONU designou o 22 de maio como Día Mundial da Biodiversidade, para comemorar a sinatura en 1992 da Convención Internacional para a Diversidade Biolóxica en Nairobi (Kenia). Este ano, o lema é "Biodiversidade Forestal, o tesouro vivinte da Terra", para subliñar o papel dos bosques na conservación da biodiversidade e no noso benestar. En Galiza, a conservación da biodiversidade, e particularmente a forestal, non é unha prioridade da administración ambiental, coas competencias repartidas en consellarías produtivistas. Coa Rede Natura máis cativa do estado, carente mesmo dos instrumentos de xestión obrigatorios por lei, e fronte a esta inacción e ás políticas agresivas da Xunta co noso patrimonio natural (eólicos, eucaliptos, piscifatorías...) os colectivos ecoloxistas seguimos comprometidos coa conservación da biodiversidade e promovendo iniciativas para protexela.

Na Galiza os bosques supoñen un 70% da superficie do país. No entanto, só un 2% é monte público, ao que lei le asigna un obxectivo de conservación. E na franxa litoral, o eucaplipto e o piñeiro ocupan o 99% do bosque costeiro, conservándose apenas o 1% de bosque autóctono, localizado en fragas moi fragmentadas e nas ribeiras dos ríos.

As recentes modificacións da Lei do Solo introducidas polo PP (mudou a consideración dos MVMC de  rústico de protección forestal a ordinaria); as SOFOR (Sociedades de Xestión Forestal) van a permitir a entrada de capital privado no monte con obxectivos claramente especuladores; albíscase unha nova vaga eucaliptizadora coa escusa dos cultivos enerxéticos; a Lei Eólica reduciu a capacidade de decisión dos propietarios entregándolle o monte ás empresas e o concurso eólico está a redobrar o asalto a hábitats de interese, especies protexidas, paisaxes singulares e patrimonio arqueolóxico. Debúxase pois a un futuro incerto, por non dicir pésimo, para a biodiversidade das nosas florestas.

Fronte a esta situación, froito da parálise en conservación e das políticas depredadoras da Xunta, as entidades ecoloxistas temos que asumir a responsabilidade da conservación da biodiversidade galega. Nestas semanas, levaremos adiante unha batería de iniciativas:

-Este sábado 21 de maio, cunha xornada sobre a biodiversidade fluvial na Eira da Xoana.

-A fin de semana do 28 e 29 de maio, cunha nova edición do campamento de voluntariado ambiental do río Tea, para a erradicación das especies exóticas e invasoras.

-Na primeira semana de xuño, cunha nova xeira do proxecto Corna para a recuperación da píllara das dunas.

-O día 4 de xuño coas xornadas "O monte, oportunidade sustentable fronte á crise", en Melide.

-E colaborando en proxectos para avaliar o estado de especies emblemáticas da biodiversidade ibérica coma a rata de auga ou o moucho.

Alén destas actividades, ADEGA vai iniciar unha campaña de adquisición de terras para preservar hábitats en regresión e promover entre os propietarios as figuras de custodia do territorio, que permitirían fixar poboación, desenvolver iniciativas de aproveitamento sustentábel e conservar valiosos hábitats naturais chave para a conservación da nosa biodiversidade no mundo rural.