3 de agosto de 2012. Coa excusa dos danos primeiro e dos híbridos despois, a Xunta levou a cabo no Barbanza unha auténtica campaña de exterminio do lobo perfectamente planificada e orquestada, que tivo como resultado a eliminación case completa desta especie. Coa axuda inestimábel de cazadores e gandeiros sen escrúpulos e a complicidade dalgúns funcionarios que por veces actúan máis como "secretarios" ao estilo das monterías franquistas que como valedores da nosa fauna, estimamos que entre 2011 e 2012 foron abatidos entre 25 e 30 lobos, a gran maioría exemplares puros. Porén, a Xunta só recoñeceu no Barbanza 4 mortes en 2011 e ningunha en 2012, logo de 3 batidas "oficiais" (e ducias de agardos "extraoficiais") segundo informou o Valedor ao que acudíu ADEGA en amparo polo escurantismo da Xunta. O balanzo: Lobatos de 3 e 4 meses masacrados, lobos decapitados e tráfico de trofeos, lazos ilegais, corrupción, desleixo e incompetencia institucional... Mentres, ducias de poldros morrerán de fame este ano nos montes do Barbanza ou liquidados polos concellos se os gandeiros non os sanean e identifican co microchip.
|
Ler máis...
|
Dende mediados de xullo está en marcha a recollida de sinaturas dunha iniciativa lexislativa popular (ILP) para a APLICACIÓN EFECTIVA DOS PRINCIPIOS DE REDUCION, REUTILIZACIÓN E RECICLAXE DE RESIDUOS EN GALIZA. Promovida por unha manchea de organizacións ecoloxistas e sociais galegas, entre as que está ADEGA, o obxectivo é dar forza xurídica á reciclaxe, desbotar a incineración que pretende o PP e sensibilizar á cidadanía sobre a necesidade dunha xestión correcta e sustentábel dos seus residuos. Para o seu debate no Parlamento, debemos recoller un mínimo de 15.000 sinaturas en 4 meses. Se eres eleitor/a en Galiza, podes asinar esta iniciativa e/ou colaborar na difusión e recollida dos pregos da campaña. Para isto, podes poñerte en contacto connosco através dos enderezos que atoparás máis abaixo. Indicarémosche a delegación de ADEGA ou colectivo máis próximo ao teu domicilio para facilitarche a sinatura.
|
Ler máis...
|
24 de xullo de 2012. Onte saíu publicada no DOG a nova Lei de montes de Galiza, que entrará en vigor no mes de agosto. ADEGA manifesta o seu pesar pola aprobación desta normativa que vai supoñer un importante retroceso para o desenvolvemento rural do noso país desde unha perspectiva integral, sostíbel e multifuncional.Para ADEGA esta normativa está feita por e para a industria forestal e enerxética, e non para os cidadáns, ademais de ser fortemente regresiva: rebaixa as distancias de seguridade contra os lumes forestais e incentiva de novo o monocultivo de plantas pirófitas, como o eucalipto e o piñeiro.
|
Ler máis...
|
Compostela, 20 de xullo de 2012. Ante o anuncio do conselleiro de Medio Ambiente de que as empresas de acuicultura van poder instalarse en áreas protexidas como Rede Natura dacordo co Plano Director da Rede Natura, ADEGA advírtelle á Xunta que está a promover, non só actuacións contrarias á lexislación ambiental, senón atentados contra recursos fundamentais para a calidade de vida da poboación e a sustentabilidade futura do litoral galego. É unha inmoralidade alentar ás empresas de acuicultura a especular cos espazos protexidos, degradar uns bens naturais que son de todos e todas para beneficio de moi poucos, e agraviar aos propietarios dos terreos protexidos que ata o momento se lles impediu desenvolver neles calquera outra actividade que non fose a tradicional. A nova non cae por sorpresa para ADEGA, pola desregulación territorial que o país leva sufrindo desde a chegada do goberno de Alberte Núñez Feixóo e pola pouca sensibilidade ambiental e social que os responsables deste Executivo xa teñen demostrado noutras etapas de goberno. Desde ADEGA, manifestamos a nosa intención de seguir traballando para que os plans da Xunta de entregar os espazos protexidos ao capital privado e especulador non cheguen a bo fin.
|
Ler máis...
|
|
Lugo, 2 de agosto de 2012. A recentemente constituída Plataforma Muralla Viva, integrada por A Cova da Terra, ADEGA, Asociación Cultural In Bocca al Luppo, AENDA Lugo, Amigos da Terra, A Revolta Natural, AVAFES, PAEXGA, Sociedade Galega de Ornitoloxía, Verdegaia, SAUDARTE e GREFA Majadahonda, quere mostrar a súa oposición ao uso de herbicidas nos labores de limpeza da Muralla de Lugo, e concretamente ao emprego do ROUNDUP PLUS de Monsanto (principio activo glifosato). Esta plataforma, tras ter noticia da inminente aplicación deste tóxico sobre o Monumento Patrimonio da Humanidade, púxose en contacto coa empresa concesionaria RESCONSA quen remitiu ao Departamento de Produción Vexetal da USC. Muralla Viva confirmou, logo dunha reunión con este Departamento, a intención da Xunta de usar este tóxico para a limpeza da Muralla nos meses de xullo e/ou agosto.
|
Ler máis...
|
Compostela, 25 de xullo de 2012. Hoxe comezou a campaña de recollida de sinaturas para que se debata no parlamento a iniciativa lexislativa popular (ILP) para a APLICACIÓN EFECTIVA DOS PRINCIPIOS DE REDUCION, REUTILIZACIÓN E RECICLAXE DE RESIDUOS EN GALIZA". O obxectivo é darlle forza xurídica e sensibilizar a poboación da necesidade dunha xestión correcta e sostíbel dos residuos e en contra da incineración que actualmente é a xestión maioritaria dos residuos no país, provocando unha forte contaminación e desbaldimento de recursos. A comisión promotora da ILP, da cal forma parte ADEGA, convídavos a apoiar esta causa que é a de todos e todas.
|
Ler máis...
|
O pasado 19 de xullo trinta voluntarias e voluntarios chegados de diferentes lugares de Galiza déronse cita unha vez máis no concello de Porto do Son para participar na eliminación de plantas exóticas invasoras. A Fundación Biodiversidad seleccionou esta proposta de ADEGA dentro do seu programa “Playas, voluntariado y custodia del territorio”, co lema “Conservando as nosas dunas”. A Actuación en Porto do Son foi a segunda e última deste programa. A primeira que se realizou foi unha actividade similar na Praia da Corna (Pobra do Caramiñal). Podes ver as fotos da xornada en Porto do Son.
|
Ler máis...
|
Lugo, a 19 de xullo de 2012. Con motivo de se cumpriren dous anos da súa constitución, o Foro do Camiño Primitivo, do que fai parte ADEGA, celebrou unha asemblea xeral para analizar a evolución do estado de conservación e protección desta milenaria calzada medieval. Malia a que hai dous anos o Foro xa alertaba á Xunta de Galiza da necesidade urxente de proceder á delimitación oficial deste primeiro camiño de peregrinación a Compostela, os membros do Foro veñen de constatar que desde aquela a Xunta aínda non deu ningún paso cara a esa dirección, permitindo que o Camiño Primitivo siga a sufrir un elevado grao de ameaza ambiental e de agresión ao seu patrimonio cultural. Así mesmo, esixe como principios irrenunciábeis na delimitación da vía a autenticidade histórica, a recuperación da súa traza antiga e a protección de ámbito BIC (Ben de Interese Cultural).
|
Ler máis...
|
|