19 de decembro de 2012. Seis anos despois de que ADEGA denunciara a construción dunha urbanización de "adosados" sobre o castro da Frouxeira e en plena Rede Natura (LIC Costa Ártabra), o xulgado do contencioso de Ferrol acaba de ratificar a paralisación das obras acordada en resposta á nosa denuncia polo concello de Valdoviño. Tras varios anos de loita e denuncias por parte de ADEGA e co apoio de veciños/as e colectivos sociais, conseguimos que os tribunais ratificaran a ilegalidade dos 69 chalés da Saíña (Valdoviño) promovidos por "Construcciones Rías Gallegas", que aínda pode recorrer a decisión. ADEGA quere agradecer a toda a veciñanza e colectivos implicados nesta loita o seu esforzo por conservar o noso patrimonio natural e cultural. Porén, e diante do desleixo cando non complicidade de Costas e a Xunta co infractor, dende ADEGA preguntámonos: Teremos que ser sempre veciños/as e ecoloxistas os que miremos polo noso medio?
|
Ler máis...
|
15 de decembro de 2012. Neste día, ADEGA celebrou en Compostela a súa 37 Asemblea Xeral. Baixo o lema "Rescata o teu ambiente", debatemos sobre a necesaria reposta do movemento ecoloxista á crise e á perda de dereitos, que son tamén ambientais. Alén de continuarmos, como vimos facendo dende hai 37 anos, a termar do ambiente fronte á recolonización e á especulación cos nosos recursos naturais, concordamos tamén en ofrecer propostas en positivo dende o ecoloxismo a nunha sociedade cada vez máis precarizada polo capitalismo. No decurso desta 37 Asemblea, eliximos tamén a nova Xunta Directiva, que preside novamente a compañeira Virxinia Rodríguez. Xa pola noite, na cea anual de confraternización, fixemos entrega dos premios Osíxeno e Dioxina 2012. Accede ao álbum coas fotos dos actos (Ramsés Pérez)
|
Ler máis...
|
Lugo, 13 de decembro de 2012. O FORO DO CAMIÑO PRIMITIVO, do que fai parte ADEGA, anunciou hoxe en rolda de prensa que recorrerá á UNESCO, ao Comité do Patrimonio Mundial, e a ICOMOS-España para denunciar a fraudulenta delimitación do Camiño Primitivo, aprobada recentemente pola Xunta de Galiza. Esta deixa sen recuperar uns 50 quilómetros da traza orixinal, case a metade do seu percorrido total, e elude a protección dun cento de elementos patrimoniais asociados á vía histórica. É por iso que o FORO pedirá a estes organismos que condicionen a declaración do Camiño Primitivo como Patrimonio da Humanidade á protección, recuperación e posta en valor da vía orixinaria.
|
Ler máis...
|
Este 12 de decembro de 11:00 a 19:00h celebrarase na Facultade de económicas da UDC a III Feira da Sustentabilidade, co fin de achegar á universidade unha mensaxe sobre o consumo responsable. Nesta feira teremos a ocasión de mercar os agasallos de Nadal dun xeito diferente. Dando prioridade ao comercio local, comercio xusto e ao traballo dos artesáns. Do mesmo xeito teremos a oportunidade de coñecer diferentes entidades e asociacións ambientalistas. Ao longo da xornada poderemos participar en diferentes obradoiros como elaboración de cosméticos naturais, elaboración de obxectos a partir de papel reutilizado con técnicas de cestería e coñecer os xogos tradicionais. Un membro do Proxecto Fiare explicaranos en que consiste o proxecto da banca ética nunha charla-debate. E por ultimo, poderemos trocar os obxectos que xa non precisamos nun mercadiño de troco.
|
Ler máis...
|
|
17 de decembro de 2012. A D. X. de Calidade e Avaliación Ambiental publicou a declaración ambiental (DIA) da mina de Corcoesto, un documento que pasará aos anais dos despropósitos ambientais (un máis) cometidos pola Xunta. Alén de que máis da metade desta DIA é un "corta-apega" literal do proxecto entregado por Edgewater, co que a Xunta asume como propios os argumentos da empresa (corta a ceo aberto, uso de cianuro, categorización errada dos refugallos, falla dun plano de emerxencia, riscos sísmicos non avaliados...), tampouco se preocupa de verificar o denunciado por ADEGA e outros colectivos a respeito da posíbel contaminación con arsénico do LIC do Anllóns. Precisamente un recente estudo do CSIC e a U. de Vigo (Costas et al. 2011) revelado pola SGHN pon de manifesto os altísimos níveis de As na bacía do Anllóns, relacionados cos antigos labores mineiros. Se unhas galerías antigas e cativas son quen de deitar 850 kg de As cada ano ao esteiro do Anllóns (Rede Natura 2000), que fará unha enorme mina a ceo aberto de máis de 1 millón de m2?
|
Ler máis...
|
Este sábado 15 de decembro terá lugar en Compostela 37ª Asemblea Xeral de ADEGA. Será na Casa das Asociacións, en horario de 10 a 14 e de 16:30 a 19:30. Dende 1976 van xa máis de 10 anos de loita ecoloxista e compromiso co país. Nesta 27 Asemblea ADEGA fará un balanzo do acontecido a nível ambiental este 2012 en Galiza e apresentaremos as liñas estratéxicas arredor das que artellaremos a resposta ecoloxista aos problemas ambientais que nos ameazan e as propostas e iniciativas para que a crise non a acabe pagando ao ambiente. Ese mesmo día celebraremos tamén a cea anual de confraternización no decurso da cal entregaremos os premios Osíxeno e Dioxina 2012.
|
Ler máis...
|
12 de decembro de 2012. Nesta data sinalada, ADEGA vén de fallar os premios OSÍXENO e DIOXINA para recoñecer ás millores e piores actuacións ambientais do ano.
Premio OSÍXENO á millor actuación/actitude ambiental do 2012:
-Categoría individual: A Alfredo López, ex-presidente da CEMMA (Coordenadora para o Estudo dos Mamíferos Mariños)
-Categoría colectivo: Á Plataforma para defensa da Ría do Burgo.
Premio DIOXINA á actitude ou actuación máis agresiva ou insustentábel:
-Categoría individual: Ao alcalde do Irixo, Manuel Penedo.
-Categoría colectivo: Aos políticos responsábeis da marea negra do Prestige (Mariano Rajoy, Álvarez-Cascos, Aznar, Arias Cañete, Fernández de Mesa e Jaume Matas).
Premio OSÍXENO DE HONRA á Plataforma Nunca Máis polo seu compromiso co ambiente e a dignidade dun país.
|
Ler máis...
|
10 de decembro de 2012. Vimos de coñecer os resultados das análises encarregadas por ADEGA ás augas do mal chamado "lago" das Pontes, resultado do proxecto de Endesa de encher de auga o oco da antiga mina de lignito. Como supoñiamos, a auga da balsa na zona de baño amosa parámetros "normais" de acidez e de metais pesados. Iso sí, carece practicamente de nutrientes e de osíxeno disolto, imprescindíbeis para o mantemento da vida animal e vexetal. Porén, o principal problema vén das augas que drenan as escombreiras "rexeneradas" e que flúen até a balsa nun perímetro de 18 kilómetros. Estas augas, canalisadas por tubaxes e canles artificiais ou escoando dos noiros, teñen unha extrema acidez (pH entre 2 e 3) e cantidades de metais pesados que chegan a multiplicar por 10.000 os presentes na balsa. O panorama dista moito do idílico "lago" que venderon Endesa e a Xunta: É unha balsa mineira morta que paseniñamente énchese de metais pesados e vírase máis ácida.
|
Ler máis...
|
|