Compostela, 20 de setembro de 2012. O Proxecto Ríos é unha iniciativa de educación e voluntariado ambiental promovida por ADEGA. A finalidade é dar a coñecer o importante papel dos cursos fluviais, amosar as súas problemáticas así como fomentar iniciativas que permitan á cidadanía o mantenemento e a mellora dos ríos proporcionando as ferramentas que garantan a súa participación. Durante esta campaña de outono están programadas saídas formativas con distintas entidades (centros de ensino de primaria e secundaria, concellos, asociacións, grupos ecoloxistas...). Outras actividades programadas polo Proxecto Ríos para esta campaña de outono é o XVI Curso de formación de coordenadores/as (29 de setembro), a V Limpeza simultánea de ríos, así como un Roteirríos o 20 de outubro.
|
Ler máis...
|
Lugo, 17 de setembro de 2012. O Foro do Camiño Primitivo, integrado por trinta entidades de carácter social, veciñal, cultural e ecoloxista (como ADEGA) e investigadores, cualifica o proxecto de delimitación oficial do Camiño Primitivo de Santiago, actualmente en exposición pública, como verdadeiro atentado contra os seus valores culturais e identidade histórica, e por ende, contra o expediente en trámite de declaración como patrimonio mundial pola UNESCO. Nunha primeira análise do documento, o Foro destaca o desatino do proxecto con respecto á proposta de delimitación do Camiño ao seu paso polo municipio de Lugo.
|
Ler máis...
|
13 de setembro de 2012. ADEGA quere expresar a súa solidariedade con veciño de Cambados Lois Baúlo, que vén de ser multado polo concello con 80€ por tentar eliminar unha mata de herba da Pampa (Cortaderia selloana), popularmente coñecida como "plumachos", especie exótica de alto potencial invasor. Lois Baúlo, técnico ambiental formado no Centro de Formación Agroforestal de Lourizán, é tamén un activo colaborador do movemento ecoloxista e ten participado en numerosos programas de voluntariado ambiental de ADEGA, nomeadamente para a erradicación das especies exóticas e invasoras. Dende ADEGA pedimos ao concello de Cambados que retire esta sanción e que, lonxe de reprimir ás persoas que perante a inacción institucional tentan preservar a nosa biodiversidade, cumpra coa responsabilidade de erradicar as especies exóticas e invasoras.
|
Ler máis...
|
12 de setembro 2012. ADEGA-Proxecto Ríos ven de participar no 4º Congreso Estatal de Especies Exóticas Invasoras. O congreso celebrouse en Pontevedra os pasados días 10 e 11 de setembro, dando paso a partir de hoxe ao Neobiota 2012 (sétima conferencia europea en invasións biolóxicas). Foron numerosas as charlas que se sucederon durante estes dous días centradas nas invasións tanto de fauna como de flora na península ibérica e en países americanos. Destacouse a importancia das labores de seguimento de calquera acción de eliminación de invasoras, e a necesidade de previsión de medios para tal fin neste tipo de actuacións.
|
Ler máis...
|
|
17 de setembro de 2012. Do 16 ao 22 de setembro celébrase a Semana Europea da Mobilidade. O obxectivo é animar ás autoridades locais a introducir e promocionar medidas de transporte sustentábel e convidar á cidadanía a buscar alternativas ao veículo privado. O lema deste año é "Participa nos planos de mobilidade da túa cidade: Móvete na boa dirección!” para destacar a utilidade do Plano de Mobilidade Urbana Sustentábel. En Galiza, este instrumento é prácticamente descoñecido e a cidadanía segue a ser vítima dunha irracional política de transportes (Plano MOVE) deseñada por e para o automóbil e a sufrir os efectos da contaminación dos coches. Mentres, a Xunta semella satisfeita coa propaganda sesgada sobre calidade do ar nas cidades, malia a infrinxir amplamente as recomendacións da OMS.
|
Ler máis...
|
14 de setembro de 2012. Que a incineradora do sur, a obra estrela do plano de residuos do PP, "pinta moi mal" segundo o conselleiro Hernández, era algo que os ecoloxistas e as plataformas sabiamos dende hai meses. Ao forte rexeitamento social que suscitaron os delirios incineratorios de Feijóo, mesmo no seu propio partido, engadiuse o demoledor efecto da supresión das primas ás renovábeis que aprobou Rajoy. A nova incineradora, fiada toda á iniciativa privada, xa nen sequera chegou a nacer. As contas non lle saíron a Estela Eólica: adiantar 230 milóns de € para ter a incineradora lista en 2014, e poñer outros 186 millóns (1 millón por MW) para construir os parques eólicos adxudicados polo PP, perdendo até o 80% de rendibilidade pola supresión das primas, foi demasiado. Agora segundo a Xunta, a incineradora do sur acabará onde todo o lixo galego... no macrovertedoiro de SOGAMA en Cerceda, hipertrofiado continuamente por Feijóo durante toda a lexislatura (este ano xa gastou máis de 42 millóns de € en amplialo) para servir como "plan B".
|
Ler máis...
|
12 de setembro de 2012. As organizacións ADEGA, Amigos da Terra, CEMMA, FEG e SGHN vimos de apresentar hoxe en Ourense Un Programa pola Terra 2012. Este documento recolle as propostas do ecoloxismo galego para que os diferentes partidos e coalicións políticas que concorren á vindeira convocatoria eleitoral, as integren na súa acción de goberno ou de oposición durante a vindeira lexislatura. A amplitude da crise ambiental global, encabezada polo incuestionábel cambio climático, o esgotamento dos recursos naturais e o incremento das desigualdades sociais, é de tal magnitude que precisa dun cambio radical nas políticas desenvolvidas polas administracións.
|
Ler máis...
|
8 de setembro de 2012. As organizacions CEMMA (Coodenadora para o Estudo dos Mamíferos Mariños), ADEGA, SGHN (Sociedade Galega de Historia Natural), FEG (Federación Ecoloxista Galega) e PDR-CIES apoian a proposta da retirada diaria das nasas destinadas á captura do polbo, nécora, choco e outras especies ao finalizar a xornada de pesca, co obxecto de reducir o esforzo pesqueiro. Deste xeito contribúese a diminuir o tempo que permanecen as nasas sumerxidas no mar, e portanto, redúcense tamén os posibles impactos ambientais que poden chegar a producir no medio mariño, principalmente a captura accidental de grandes vertebrados mariños, algúns en perigo de extinción, que resultan vulnerábeis á interacción con obxectos estáticos presentes no mar. Informe IMPACTO NASAS (5.64 MB)
|
Ler máis...
|
|