Lugo a 07 de setembro de 2010.- Máis dun cento de persoas participaron o pasado domingo día 5 de setembro no roteiro reivindicativo organizado pola Plataforma “Salvemos o Río Eo” do concello de Ribeira de Piquín. A marcha tivo como obxectivo reclamar unha vez máis a caducidade da concesión dunha minicentral hidroeléctrica a instalar no río Eo. O percorrido foi de 10 quilómetros desde a Ponte de Mede ata o lugar coñecido como Os Congos (penso que se chama Os Cangos), seguindo a zona que se vería máis afectada de se executar o proxecto.

Lugo, a 23 de xullo de 2010.- A Asociación para a Defensa Ecolóxica de Galiza (ADEGA) en Lugo vén de presentar perante a Confederación Hidrográfica do Miño-Sil e ante o Seprona o anunciado informe no que sinala, baixo coordenadas, os puntos da parte alta do río Rato afectados por recheos irregulares, así como as zonas nas que o seu caudal se perde polos antigos colectores.

Lugo, a 19 de xullo de 2010.-A parte alta do río Rato estase a ver afectada gravemente polos recheos executados á altura do novo polígono das Gándaras, do Centro comercial das Termas e no polígono do Ceao, que están reducindo a superficie das zonas húmidas nas que nace o afluente do Miño e que o abastecen de auga durante todo o ano, coa consecuente e progresiva redución de caudal. ADEGA xa denunciou en varias ocasións as afectacións das obras do polígono das Gándaras sobre o regato, pero non é o único punto negro. Á altura do polígono do Ceao, na zona na que está instalada a antiga planta de alcatrán, centos de metros cadrados de zona húmida, da que tamén se abastece o Rato, foron taponados con toneladas de terra. E poucos metros máis abaixo do centro comercial das Termas, preto do Parque de Bombeiros, na antiga Agra de Cedeira, os recheos realizados de hai algo máis de un ano, afectaron tamén a un pequeno nacemento de auga que ía dar ao río Rato e cuxo destino agora é descoñecido.

Lugo, 22 de xuño de 2010. O domingo 27 de xuño, remataremos o ciclo de roteiros 2009-2010 de ADEGA-Lugo na Costa da Morte. Achegarémonos alí, como símbolo do final dos camiños que van na busca do Sol, e tamén por unha causa reivindicativa: a defensa do río Xallas. Sairá un bus desde Lugo (fronte a Escola de Maxisterio) ás 8:00 horas, e dende Compostela (Pazo de Congresos, San Lázaro) ás 9:30 horas.