Os informes arqueolóxicos destas excavacións veñen a confirmar os argumentos sobre interese histórico e tamén xeolóxico do xacemento que ADEGA e Mariña patrimonio vimos defendendo dende que en xuño do 2006. Daquela, denunciamos ante a Consellería de Cultura, a Dirección Xeral de Urbanismo e o Concello de Cervo, o inicio das obras de cimentación para a construción de 42 vivendas e que, con alevoso incumplimento da lexislación sobre o Patrimonio cultural e irresponsable desacato fronte a orde de paralización da Delegación Provincial de Cultura, provocou a desaparición dos abundantes e valiosos restos arqueolóxicos de cerámica, muíños e muros castrexos nunha extensión duns 1600 metros cadrados.

Ten sido moito o patrimonio destruído pola irresponsabilidade dunha administración municipal capaz de outorgar unha licenza municipal sen adoptar cautela algunha sobre un patrimonio cuxa existencia tiña máis que sobradas evidencias; ten sido moito o patrimonio arqueolóxico que con alevosa irresponsabilidade acabou convertido en escombreira, pero queda moito aínda que merece e necesita ser conservado, pois estamos, con toda seguridade, ante un castro prerromano que ocupaba a totalidade da illa (hoxe unida a terra por unha estrada asentada sobre un areal) que perdura máis ala da época romana ata quedar sepultado por unha cuberta de area.

Dende ADEGA gustaríanos que esta exposición servise para alertar as conciencias de todos e todas e que, dende esta sensibilidade, logremos que a Xunta e a Xustiza tomen todas as medidas necesarias para a protección, conservación e posta en valor da totalidade do xacemento e para que, asimesmo, non poda quedar impunes a irresponsabilidade e o desacato con que foi destruído unha parte importante do mesmo.