09 de marzo de 2012.- Hai máis dun ano que ADEGA (Asociación para a Defensa Ecolóxica de Galiza) e PAEXGA (Protectora de Animais Exóticos de Galicia) denunciamos a situación da proliferación da herba da pampa na autovía A-6. Tras a presentación das nosas reclamas, vimos comprobando que nos últimos meses, o Ministerio de Fomento está a dipoñer traballos de erradicación desta especie ao longo de toda a autoestrada A-6, algo que nos congratula e que lle recoñecemos a esta institución. Mais, tamén demandamos a mesma disposición para outras estradas principais de Galiza que se atopan na mesma situación de invasión por plantas exóticas.

Este domingo 26 de febreiro convidámoste a un novo roteiro máxico. Desta volta discorrerá principalmente polo concello do Saviñao, en plena Ribeira Sacra. Os ríos Miño e Sil que a atravesan son o lar das xacias, seres metade humanos e metade peixes que poden vivir tanto no fondo dos pozos como en terra, principalmente nos castros. Poderemos gozar dos espazos naturais únicos da ribeira do Sil e visitarmos mosteiros como o da Cova (xoia do románico rural), o de Diomondi e o de Santo Estevo. Ademais, contemplaremos as panorámicas do meandro do río Sil onde a terra recibe o nome de Cabo do Mundo. Descarrega aquí o CARTAZ.

Lugo, a 13 de febreiro de 2012.- Desde ADEGA sumámonos á petición dos veciños e veciñas de Cereixedo, do concello de Cervantes, que reclaman ás autoridades que se restaure a súa Igrexa parroquial, cuxo estado de conservación é lamentable e mesmo existe risco de desprendemento dalgún dos seus altares, o que podería poñer en perigo a seguridade dos fregueses. Por iso vimos de presentar un escrito ante Consellaría de Cultura, e nomeadamente á Dirección Xeral de Patrimonio Cultural, facendo formal a nosa petición. ADEGA coñeceu as reclamas dos veciños o pasado 29 de xaneiro, durante a realización dun roteiro polas montañas de Cervantes, inspirado na lenda popular da Cerva Branca. Á nosa chegada a Cereixedo visitamos a Igrexa, converténdonos en testemuñas directas do mal estado de conservación no que se atopa, pese ao seu grande valor patrimonial.

Lugo, 9 de  febreiro de 2012. Parte da gran degradación paisaxística, biolóxica e cultural que estamos a sufrir no país é debida ás permisivas normativas forestais que ao longo dos anos favoreceron a destrución total ou parcial de grandes e pequenas superficies de carballeiras e outras masas forestais autóctonas, que logo mudaron de uso e foron transformadas en plantacións de piñeiros ou eucaliptos. ADEGA demándalle á Xunta que a nova Lei de Montes limite as cortas a feito das fragas, que non permita a súa restitución por especies de crecemento rápido e que faga cumprir a lexislación xa existente neste senso. O contrario suporía perpetuar o "franquismo forestal" en forma de máis monocultivos en detrimento da floresta autóctona e da diversidade natural e paisaxística galega.