Lugo, 22 de setembro de 2011. Hoxe ADEGA fixo entrega  dos premios aos mellores relatos curtos do concurso “O lugar onde vivo” e ás mellores fotografías do concurso “Fotografías polo Territorio” convocados a pasada primavera dentro da campaña “PONTE NO MEDIO. MÓVETE POLO TERRITORIO”. Teolinda Lorenzo e Luis Suárez López foron os gañadores do concurso de fotografía nas categorías xuvenil e adulta, respectivamente. En canto ao concurso de relatos, resultaron galardoados Sara Azidane, na categoría xuvenil, e María Brañas, na adulta. O Delegado de Cultura da Deputación de Lugo, Mario Outeiro, e o Secretario Xeral de ADEGA, Froilán Pallín foron os encargados de entregar os premios.

Lugo, a 28 de Xullo de 2011.- Ante o anuncio no Diario Oficial de Galicia do 20 de Xuño do 2011, pola que se nos informa da solicitude do Grupo SADA P.A. Castilla-Galicia S.A. de Autorización ambiental integrada para a ampliación do matadoiro de aves que o grupo posúe en Castro de Ribeiras de Lea, no concello de Castro de Rei (Lugo), ADEGA alega sobre os impactos que o proxecto podería carrexar para o medio ambiente.

Lugo, 22 de xuño de 2011. ADEGA Lugo pecha o vindeiro domingo 26 de xuño o seu programa de roteiros 2010-2011 dedicado á lingua galega cunha andaina pola "raia" con Portugal, na bisbarra  na que  naceu a asociación cultural e pedagóxica “Ponte nas ondas!”. Esta entidade, que contribúe a reforzar as relacións sociais, educativas e lingüísticas aos dous lados do pai Miño, será a que nos guíe nesta ruta que descorrrerá entre Salvaterra e Monçao.

Lugo, 11 de xuño 2011. O Encontro de Escritor@s celebrado hoxe no Salón de Actos da Deputación de Lugo por ADEGA dentro da súa campaña por unha ordenación sustentable do territorio “Ponte no medio. Móvete polo territorio” acolleu unha ducia de autores e autoras galegas para retratar a súa relación co territorio galego e, nomeadamente, co lucense a través da literatura ou da toponimia. No encontro púxose de relevancia a situación de declive da conservación da literatura oral, escrita e da toponimia ligada ao territorio galego e instouse ás autoridades públicas competentes, autonómicas e locais, a velar pola súa preservación.

Este sábado 11 de xuño ADEGA reúne, no Salón de Actos da Deputación Provincial de Lugo das 9:30 ás 19:30 h, a persoeiros da cultura galega nunha xornada que leva por título “Escritor@s polo Territorio”. Os encargados de abrir este acto serán o Vicepresidente Primeiro da Deputación de Lugo en funcións, Antón Bao e a Presidenta de ADEGA Virxinia Rodríguez. O encontro de escritores/as está enmarcado na campaña “Ponte no Medio. Móvete polo Territorio” que está levando a cabo ADEGA ao longo deste ano através de accións culturais, reivindicativas e xurídicas pola defensa do noso Territorio e contra a desfeita especulativa. “Ponte no Medio. Móvete polo Territorio” defende unha ordenación sustentable e unha alternativa posible de futuro. Baixa o Díptico (867 Kb) das xornadas.