28 de novembro de 2012. A campaña que SOGAMA está a desenvolver en cidades e vilas galegas para promover a reutilización e o reciclado, debido aos ridículos índices que amosa a xestión dos refugallos en Galiza, é un exercicio de esquizofrenia e desvergoña sen límites. Se é precisamente debido ao modelo SOGAMA (incineración + verdido) que a reciclaxe acada os níveis máis baixos do estado e de Europa! Por outra banda, a Xunta gábase de que a xeración de refugallos diiminuiu un 6,4% dende a aprobación en 2010 do Plano de Residuos (PXRUG)... Non será máis ben que ao igual que caeu a actividade económica e o consumo, a xeración de residuos diminuíu sobre todo pola crise? Así o recoñece no documento de modificación do PXRUG 2010-2020 que está a tramitar, cualificando a crise como un "avance" na redución da produción de lixo. En definitiva: outra campaña-trampa de SOGAMA deseñada para vender como virtudes as súas vergoñas, mostra da incompetencia e o cinismo sen límites da Xunta.
|
Ler máis...
|
|
26 de novembro de 2012. O capital das transnacionais acuícolas e os seus testaferros políticos, encabezados polo ministro Cañete e a conselleira Quintana, tentan conquerir que na nova PPC (Política Pesqueira Común) volva a ser subvencionábel a acuicultura industrial. Cómpre lembrar que na actual PPC as macropiscifatorías non reciben fundos comunitarios, que van ao fomento da acuicultura tradicional, o marisqueo e a pesca de baixura. ADEGA quere alertar ao sector pesqueiro e marisqueiro galego dos riscos dun modelo -a macroacuicultura industrial- moi cativo na xeración de emprego e con graves impactos nos ecosistemas litorais. A comisaria de Pesca Sra. Damanaki debería informarse polo seu colega Sr. Potocnik do que significa a Rede Natura 2000 e do que a Directiva 92/43CEE (de hábitats) di sobre os aproveitamentos compatíbeis/incompatíbeis. Dende cando desfacer hábitats protexidos é compatíbel coa súa conservación?
|
Ler máis...
|
23 de novembro de 2012. Nun folleto da campaña "Separemos ben, reciclaremos millor" promovida por Ecoembes e a Xunta para divulgar a recollida selectiva e a reciclaxe, ínstase á cidadanía a separar e depositar correctamente os distintos tipos de refugallos nos correspondentes contentores. Pois ben, á hora de indicar que tipo de refugallos deben ir ao contentor xenérico (verde), atopamos a seguinte lenda: "Deposita neste colector aqueles residuos que non sexan envases e que non se poidan reciclar", acompañada dos pictogramas de diversos refugallos: cueiros, plásticos non envases, roupa e... materia orgánica!!! Este suposto erro, non só reflicte claramente a consideración que para a Xunta ten a materia orgánica, que queima e enterra en SOGAMA, senón que supón o recoñecemento implícito do incumprimento por parte SOGAMA da Lei 22/2011 de residuos.
|
Ler máis...
|
17 a 25 de novembro de 2012. Nestas datas, celébrase a Semana Europea de Prevención de Residuos. Esta iniciativa da UE pretende concienciar sobre a necesidade de reducir a produción de residuos, incidindo en todo que se pode e debe facer antes de eliminar, para reducir os custos do tratamento e a nocividade dos residuos producidos. O millor residuo, portanto, é aquel que non se produce. Mais que acontece en Galiza? Sen que a Xunta adicara un só euro a prevención, dende 2009 a xeración de refugallos descendeu un 7,68%... pola crise. Este é, segundo a Xunta*, o principal "avance" do PXRUG 2010-2020, que fixaba o obxectivo "estratosférico" do 10% de redución... para 2020. Dende ADEGA queremos insistir na prioridade legal que a prevención, a recollida selectiva e a compostaxe teñen na xestión dos refugallos, ao contrario do que pretende o actual PXRUG e realiza SOGAMA. Participa con ADEGA nas iniciativas que promovemos para esta semana da prevención.
|
Ler máis...
|
15 de novembro de 2012. O tratamento dos refugallos do Prestige recollidos da costa é un asunto escuro aínda sen resolver que novamente amosa o desleixo das administracións, que mesmo poderían estar incorrendo en ilegalidades. Acontece que das 90.000 t recollidas unhas 10.000 fican aínda sen tratamento "armacenadas" ilegalmente nunhas balsas nas Somozas. A Lei 22/2011 de residuos e solos contaminados obriga a tratar estes refugallos nun prazo máximo de 6 meses... E van alá xa 10 anos. E das 80.000 "tratadas" por SOGARISA, das cais 9600 eran de plásticos e 6400 de fuel, "valorizáronse" (isto é, incineráronse) 956 de plásticos e 482 de fuel, isto é, un 10,2 e un 7,5% respeitivamente. Onde foron o resto dos plásticos e do fuel? Se consideramos que estes eran o verdadeiro refugallo, resulta que o 91% de plásticos+fuel foi ...a vertedoiro! E para iso pagamos 24 millóns de €? Informe SOGARISA Refugallos Prestige 0,6MB
|
Ler máis...
|
Novembro de 2012. A Plataforma Nunca Máis, da que fai parte ADEGA, vén de apresentar un recurso de reposición contra o acordo co Consello da Xunta polo que aprobaba o Plano CAMGAL (Plano territorial de continxencias por contaminación mariña accidental de Galiza). Á marxe de seguirmos dependendo das decisións políticas, que como vimos hai 10 anos foron as responsábeis de virar un accidente en catástrofe, a análise de riscos que fai o documento é preocupantemente incompleta. Esta falta de información é crítica para avaliar os riscos: Como é posíbel, por exemplo, que das ducias de sentinazos que se producen anualmente fronte ás nosas costas o CAMGAL non considere a súa localización, frecuencia e perigosidade e só se limite a describir o concepto? Como é posíbel que siga sendo Madrid quen designe, chegado o momento, un porto refuxio entre os 1500 km de costa galega?
|
Ler máis...
|
|
|
|
<< Inicio < Anterior 11 12 13 14 15 16 17 18 19 20 Seguinte > Final >>
|
Páxina 11 de 47 |