O Proxecto Ríos participará esta semana na I Xornada de Custodia Fluvial e Participación Cidadá da Associació Hàbitats de Catalunya. O encontro que se celebrará os días 9 e 10 de abril en Manlleu, pretende ser un espazo de intercambio de experiencias e reflexións sobre as estratexias de conservación e mellora dos espazos fluviais, desde a óptica da participación cidadá.

Descarrega o cartaz JORNADES (284 KB)

As actividades deste 9 de abril serán no Museo Industrial do Ter en Manlleu e consistirán en conferencias e mesas redondas sobre as oportunidades da custodia fluvial. Na xornada do sábado 10 de abril realizaranse duas saídas de campo para coñecer diferentes experiencias de restauración fluvial; pola mañá visitaremos o río Ripoll ao seu paso por Sabadell e pola tarde achegaremonos aos traballos realizados da man do concello de Vic.

Pola sua parte o Proxecto Ríos presentará as suas experiencias de custodia, nomeadamente o Proxecto Tea e o Proxecto Castieixas.
O Proxecto Tea é un programa de Campos de Voluntariado Ambiental para a eliminación de flora exótica no río Tea, comezaron no ano 2007 en colaboración co Ministerio de Medio Ambiente, Medio Rural e Marino, dentro do programa de Voluntariado en Ríos da citada entidade. Empregando a metodoloxía do Proxecto Ríos, realizouse unha análise da saúde do río e das súas marxes, e co resultado destas inspeccións, estableceuse a diagnose do estado do río Tea e as liñas de actuación a desenvolver.

Dos diferentes impactos atopados; vertidos, lixo, presenza de especies exóticas invasoras, etc., a equipa de educadoras ambientais, o voluntariado e expertos consultados, valoraron desenvolver accións encamiñadas a divulgar a problemática das especies exóticas invasoras e experimentar e estudar métodos de eliminación. Acacia negra, falsa acacia, mimosa, tintureira, Tritonia sp, falso bambú ou garrapatón, son algunhas das especies exóticas invasoras sobre as que se está a traballar.

O proxecto Pozos de Castieixas, pretende achegar solucións ao problema do abandono e a perda das pozas e regos e con elas das poboacións de anfibios, mediante unha iniciativa de custodia do territorio e voluntariado ambiental.
A actuación financiada pola Obra Social de Caixa Catalunya, desenvólvese na Comarca de Terra de Caldelas, nunha parcela de hectárea e media custodiada por ADEGA. A finca alberga prados de dente e de sega, unha carballeira, así como un conxunto de pozos e regos en distintos estados de conservación. O Proxecto Castieixas contempla o estudo, a divulgación e a conservación deste patrimonio natural e cultural, mediante diferentes accións de educación e voluntariado ambiental. Algunhas das actividades realizadas son: recollida de información sobre o uso destas construcións, inventariado e seguimento da fauna e flora que as habita, así como tarefas destinadas a restauración e mantemento dos pozos abandonados e a creación de novas charcas.