Lugo, 6 de xullo de 2012. A Xornada “A cultura do monte” organizada por ADEGA o pasado 29 de xuño acolleu a expertos na cultura tradicional galega, nos montes veciñais en man común e no patrimonio cultural dos montes. O acto, que estivo apoiado pola Área de Cultura e Turismo da Deputación provincial de Lugo, celebrouse no Salón de Actos desta institución. Esta palestra foi a primeira do ciclo de charlas que ADEGA prevé para a segunda edición do proxecto “Cultura e Territorio”, enmarcada na campaña “Ponte no medio. Móvete polo territorio”, que pretende dar resposta ás agresións contra o noso patrimonio cultural e ambiental do país.

Lugo, 3 de xullo de 2012. ADEGA inaugurou hoxe a exposición de humor gráfico “Rir, por non chorar” na Praza de San Marcos de Lugo ás 12 horas. Durante unha semana, até o 10 de xullo, esta exposición brinda a todos os cidadáns de Lugo unha oportunidade para achegarse ás problemáticas ambientais galegas que afectan ao noso territorio dende outro prisma, a través da visión irónica e crítica dos artistas gráficos galegos. Esta mostra percorrerá varias localidades da provincia de Lugo até finais de ano.

29 de xuño de 2012. ADEGA-Lugo vén de facer público un informe que compara o consumo enerxético da fatoría de ALCOA-San Cibrao cos consumos de diversos sectores socioeconómicos galegos. Os datos amosan a enorme pegada enerxética dunha instalación e un proceso, a electrólise do aluminio, moi intensivo no consumo de electricidade. Unha industria que por si soa consome tanta electricidade como o 74% dos fogares galegos contrae unha débeda ecolóxica proporcional coa sociedade, vistas as consecuencias que a obtención desta enerxía ten no ambiente. Porén, e fronte aos crecentes esforzos que se esixen á cidadanía (suba de impostos, encarecemento dos servizos, perda de dereitos...) as pretensións de ALCOA de obter a luz máis barata baixo a ameaza de peche e "deslocalización" semellan case obscenas. Como é que logo de 32 anos, ALCOA-San Cibrao non puxo en marcha ningún sistema de autoconsumo enerxético (solar, eólico, maremotriz, biomasa...) para reducir a súa fatura eléctrica? Análise comparativa ALCOA

Lugo, 27 de xuño de 2012. Nos vindeiros meses ADEGA, grazas á colaboración da Área de Cultura e Turismo da Deputación Provincial de Lugo, desenvolverá varias actividades dentro da segunda edición do proxecto “Cultura e Territorio”, que se enmarca na campaña “Ponte no medio. Móvete polo territorio”. Esta campaña pretende dar resposta a estas accións contra o noso patrimonio cultural e ambiental e está baseada na información contrastada e na procura de solucións e propostas realmente sostibles e equilibradas de respecto cara o entorno.