Lugo, 29 de Outubro de 2012.- A delegación de Lugo da Asociación para a Defensa Ecolóxica de Galiza (ADEGA) estará o vindeiro mércores na Facultade de Formación do Profesorado, na Avenida de Ramón Ferreiro, desde as 10:30h ata ás 14.00 h para recoller sinaturas en contra da incineración e a favor da redución, reutilización e reciclaxe. Estas sinaturas son recollidas para unha iniciativa lexislativa popular (I.L.P.) que ADEGA, entre outros colectivos, está a levar a cabo desde mediados de xuño en toda Galiza.

A Mariña, 24 de outubro de 2012. ADEGA e MariñaPatrimonio denunciaron perante o Servizo de Patrimonio Cultural da Xunta un novo caso de tala dun monte de eucaliptos en Os Castros ou Engrobias, na parroquia de San Martiño do concello de Foz (Lugo), para que se investiguen os posibles danos que estes traballos están a xerar no devandito castro.

Lugo, 17 de outubro de 2012. ADEGA vén de apresentar Recurso de Reforma contra o Auto do Xulgado de Instrución nº 1 de Mondoñedo decretando o sobresemento da denuncia penal contra o Alcalde de Barreiros Alfonso Fuente, a Comisión de Goberno do Concello e a arquitecta municipal. Marta Geada, e pídelle á Administración de Xustiza que garanta a independencia dos xuíces contra a intromisión do poder político. ADEGA advirte á Comisión de Goberno do Concello de Barreiros e á propia Xunta de Galiza, que argallou un fraudulento convenio para pagar con cartos públicos os incumprimentos dos promotores e tapar as ilegalidades cometidas polo concello, que poñerá todo o seu esforzo e empeño en que estas actuacións non queden impunes.

Lugo, 28 de Setembro de 2012.- Un cento de persoas achegáronse á carpa que ADEGA instalou no Parque dos Condes de Monforte de Lemos e que albergou a exposición itinerante de humor gráfico “Rir por non Chorar” desde o pasado día 24 até o 27 de setembro. Pese ao mal tempo foron moitos os cidadáns que disfrutaron da exposición e incluso colaboraron coa mesma traendo viñetas de creación propia. Esta exposición está enmarcada dentro dos actos do Proxecto “Cultura e Territorio” que ADEGA leva a cabo durante este ano 2012, un proxecto cuxo obxetivo é divulgar as ameazas que se cernen sobre o noso patrimonio natural e cultural ademáis de buscar solucións e propostas realmente sostibles e equilibradas de respecto ao noso entorno.