2 de febreiro, DÍA MUNDIAL DOS HUMIDAIS. Nesta data adoptouse en 1971 a convención internacional Ramsar para a conservación e o uso racional dos humidais. Os ecosistemas húmidos son parte da nosa riqueza natural e grazas a eles recibimos servizos por valor de millóns de euros (de xeito totalmente gratuíto). O lema deste ano, "Os humidais coidan da auga", fai fincapé no papel fundamental que teñen os humidais na dispoñibilidade e boa calidade das augas. Dende ADEGA quixemos ir máis aló, e atender tamén aos pequenos humidais (menores dunha hectárea) que non están protexidos pola convención Ramsar. Eis a razón do proxecto "CHARCAS CON VIDA" que ADEGA apresenta este 2 de febreiro en Pontevedra. Malia ser unha peza chave para a conservación do noso patrimonio natural e cultural, son hábitats descoñecidos, infravalorados e sometidos a un rápido proceso de degradación e desaparición.

Os pequenos humidais ou charcas ofrécennos numerosos beneficios ecosistémicos xa que albergan importantes poboacións de algas e plantas. Especies raras ou ameazadas de anfibios, odonatos, etc. precisan deste medio para completar o seu ciclo vital. As charcas tamén funcionan como corredores biolóxicos que incrementan a conectividade entre hábitats. Moitas delas constitúen elementos patrimoniais singulares que abundan na xeografía galega. Alén disto, estes pequenos ecosistemas tamén funcionan sendo reservorios de auga doce, captadores de CO₂ ou sistemas de depuración natural. Do mesmo xeito, os humidais de pequeño tamaño son espazos con grandes potencialidades para a educación ambiental e a investigación.

Porén, as charcas e os seus beneficios son descoñecidos pola cidadanía, o que conleva unha ameaza constante de desaparición. Coa intención de difundir os valores e importancia das charcas e de contribuir ao seu estudo e conservación, nace o proxecto "CHARCAS CON VIDA". Custodia do territorio, educación ambiental e voluntariado ambiental únense neste proxecto para dar a coñecer os pequenos humidais de Galiza, contribuíndo á conservación do patrimonio e da natureza. Este proxecto conta coa colaboración da Fundación Biodiversidade, do Ministerio de Agricultura, Almentación e Medioambiente.

Celebrando o día Mundial dos Humidais ADEGA, organiza unhas xornadas no Pazo da Cultura de Pontevedra sobre a importancia da conservación das charcas. O encontro para o que xa están inscritas 80 persoas, contará cos relatorios de membros de entidades relacionadas coa conservación e investigación destes espazos procendentes de Menorca, Portugal e Galiza.