Compostela, 9 de febreiro de 2011. O Plano de Residuos de Feijóo amosa novamente a súa verdadeira faciana. Perante a incapacidade de SOGAMA para tratar o lixo que chega a Cerceda e a imposibilidade de ter en marcha a segunda incineradora nesta lexislatura, a solución do PP é sinxela: facer máis vertedoiros e agrandar os existentes. Nesta liña vai a recente ampliación do vertedoiro da Areosa, en Cerceda, e a manchea de proxectos de vertedoiros camuflados como "restauración de canteiras", quer o da parroquia de Camanzo, en Vila de Cruces, con capacidade para 95.000 T/ano. Dase a circunstancia de que esta canteira foi declarada ilegal polo TSXG e o proxecto de recheo con lixo carece de Avaliación de Impacto Ambiental. Esta é a cara "B" de SOGAMA, que Hernández e Feijóo teiman en defender: megawatios para os amigos a cambio de incineradoras, agasallos ás canteiras ilegais para o lucrativo negocio de "restaurar" con lixo, mentres segue a mederar o monstruoso vertedoiro de Cerceda.  Alegacións_CANTEIRA_CAMANZO (41 Kb)

Para ADEGA e para os veciños de Camanzo resulta totalmente inaceptable que unha restauración que a empresa está obrigada a acometer se poida converter agora nunha nova actividade lucrativa (durante 15 ou 25 anos) en beneficio, ademais, da mesma empresa a quen durante máis de 20 anos se lle consentiu lucrarse dunha actividade ilegal. A obriga de restauración da canteira vén determinada por  tratarse dunha actividade exercida de forma ilegal e tamén por disposición da lexislación mineira, que non permite o outorgamento de autorización algunha sen previamente ter aprobado o correspondente Plan de Restauración.

A este respecto, as alegacións insisten en que a lexislación da minaría dispón claramente que a restauración de espazos afectados polas actividades mineiras ten que estar garantida pola propia explotación mineira a través do correspondente Plan de Restauración (como xa se dixo) e do depósito da suficiente garantía financeira a disposición da Administración a fin de que esta, ante calquera incumprimento por parte da entidade explotadora, poida asumir a súa execución.

Ao mesmo tempo, ADEGA e os veciños alegan que resulta totalmente inaceptable que a restauración da canteira poida realizarse con residuos que nada teñen que ver cunha actividade mineira. Por moito que dende o Concello se diga que só se van a admitir residuos inertes, os veciños saben ben que, para poder ser unha actividade lucrativa, a este vertedoiro só van a chegar aqueles residuos de difícil eliminación e tratamento. Así o recoñece o mesmo proxecto no seu catálogo de residuos susceptíbeis de  ser admitidos no vertedoiro.

Os veciños e veciñas de Camanzo rexeitan ter ao lado das súas casas un vertedoiro de residuos orgánicos e de lodos de todo tipo como os procedentes da industria do coiro e téxtil, do refino do petróleo, do tratamento de plásticos, do filtrado de gases, de depuradoras, etc. e con maior razón cando o oco da canteira está rodeada de abundantes mananciais de auga, ao lado mesmo dunha explotación de agricultura ecolóxica e sobre un solo de protección agropecuaria (cunha concentración parcelaria recentemente acabada na que a Xunta ven de gastar case que 3 millóns de euros no acondicionamento de fincas e camiños).

Por outra banda, as alegacións lembran á Xunta que a restauración dun espazo afectado por explotacións mineiras é unha competencia de Minas e que a Consellería de Ordenación do Territorio pode cometer quebranto de sentenza e fraude de Lei ao facer pasar como Plan de Restauración dunha canteira ilegal o que non é máis que unha nova actividade lucrativa.

Por todo o dito, o escrito de alegacións, -despois de advertir que non se someteu a información pública ningún Estudo de Impacto Ambiental-, acaba solicitando o rexeitamento do proxecto por parte da Dirección Xeral de Calidade Ambiental e que, en todo caso, se devolva a competencia administrativa á Administración de Minas a fin de que esta, en aplicación da legalidade vixente e en cumprimento da sentenza de paralización, esixa á empresa "MARMOLES DE PUENTELEDESMA, S.L." a restauración do oco da canteira e a devolución aos seus propietarios das terras indebida e ilegalmente ocupadas.