Lugo, a 19 de xaneiro de 2011. O vindeiro domingo 23 de xaneiro, ADEGA Lugo lévanos a unha das terras máis prolíficas de Galiza en poetas e escritores, homes e mulleres de palabra: A Chaira. O roteiro, inserido dentro do programa de rutas pola lingua de ADEGA deste curso 2010-2011, contará coa presenza e colaboración de Marica Campo, quen nos guiará pola ruta da auga de Guitiriz. Podes descargar o mapa do roteiro nesta LIGAZÓN.

Dedicamos este roteiro aos moitos escritores que por nacemento e/ou sentimento teñen a Terra Chá presente na súa obra: Manuel María, Darío Xohán Cabana, Aquilino Iglesias, Xosé Mª Díaz Castro, Marica Campo... A resposta á pregunta de por que a Terra Chá deu tantos  poetas está ben clara nos versos de Manuel María: “ Ollada a Terra Chá desde as alturas/ é semellante a un mar en calma./ Para medila só valen dúas mesuras: /¡ferrados de corazón, fanegas de alma!. Son, pois, os poetas chairegos agrimensores que, diante da inmensidade, caen na tentación de medila.

Eliximos para este roteiro pola Chaira a ruta da auga, que é un suave paseo pola natureza, historia, literatura e etnografía do concello de Guitiriz. Seguindo os pasos do poeta Xosé María Díaz Castro á beira dos ríos Parga e Ladroil, a ruta percorre o camiño que vai dende un singular lugar: a ponte de Santo Alberte, onde conflúen unha ponte romana, unha capela gótica e un destacado cruceiro, ata a Carballeira de Pardiñas. O sendeiro enlaza o Camiño  Xacobeo do Norte coas tres fontes de augas curativas máis emblemáticas de Guitiriz: a fonte de Valdovín en Parga, a de San Xoán de Lagostelle, no impoñente balneario de Guitiriz, e a de Santo Domingo en Pardiñas.

O roteiro ten un trazado sen desniveis e unha lonxitude de 20 km (pode acurtarse a 15 km) polo que pode considerarse de dificultade media.