Lugo, a 30 de setembro de 2010. ADEGA estivo presente nun pleno surrealista no que finalmente aprobouse o Plano Xeral de Ordenación Urbana de Lugo, pero no que non se entrou a valorar as cuestións fundamentais do documento sobre o futuro desenvolvemento e ordenación urbanística, nin moito menos a súa xustificación ambiental. O PXOM de Lugo aprobouse cos votos a favor de PP e PSOE e o voto en contra do BNG.

Consideramos, pois, provocadoras para todos os lucenses as palabras do grupo local do PSOE sobre a “súa aposta pola participación pública e democrática” na elaboración do planeamento.

Ao noso xuízo foi desesperanzador non escoitar en toda a sesión nin unha soa mención a documentos de transcendencia fundamental e que foron froito dunha verdadeira participación cidadá: referímonos á AXENDA 21 convertida, polo visto, nunha mera campaña publicitaria. Tampouco apareceron mencionados outros documentos ou plans elaborados coa participación social, como o Plano de Mobilidade ou o Plano Estratéxico. Neles aparecían reflectidos obxectivos concretos a levar a cabo e que deberan dirixir este plan hoxe aprobado de xestión da ordenación urbana e rural.

Tampouco se mencionou o papel deste planeamento para a contribución a nivel local da mitigación dos efectos do cambio climático e a mellora da calidade de vida das persoas.

Este plan debera ter sido unha ferramenta insustituíble para corrixir políticas urbanísticas causantes da actual crise social converténdose nunha continuación de políticas baseadas nos mesmos erros. O PXOM aprobado contempla un crecemento urbanístico desorbitado que non se axusta nin á demanda das mellores etapas da explosión urbanística.