Ferrol, 22 de xullo de 2010. ADEGA vén de apresentar alegacións ao proxecto de dragado e voadura de fondos mariños na ría de Ferrol. A zona de actuación está incluida dentro do LIC Costa Ártabra pertenecente á Rede Natura 2000, e conta con especies protexidas e unha riquísima biodiversidade nos seus fondos. O obxectivo último do proxecto é facilitar a entrada de gaseiros á planta de Mugardos, que incumpre a normativa actual de tráfico para este tipo de barcos con mercadorías perigosas. O EIA tampouco axústase ás recomendacións do CEDEX e sospeitamos que o volume das voaduras será moi superior ao recollido no proxecto.

Alegacións_VOADURA_FONDOS (286 Kb)

A Autoridade Portuaria de Ferrol pretende dragar a canle de entrada da ría, un espazo catalogado como Lugar de Importancia Comunitaria pertencente á Rede Natura.

Nestes fondos mariños protexidos existen hábitats prioritarios dun grande valor ecolóxico cunha alta biodiversidade. Abonda con sinalar que dúas das agullas de rocha que a Autoridade Portuaria quere facer desaparecer teñen 65 e 83 especies mariñas diferentes cada unha de elas.

ADEGA vén de apresentar alegacións a este proxecto fundamentadas no alto impacto medioambiental e na falta de xustificación de esta actuación.

Na actualidade non existe ningun tipo de problemas de navegación para os barcos que acceden o Porto de Ferrol. A nova dársena recentemente construida no exterior da ría evita a navegación dos grandes buques por este estreito canal de entrada. Os barcos que acuden a reparar nos asteleiros entran en lastre e sen problemas de calado, e os maiores barcos da Armada non precisan dun calado superior aos 7 metros .

Tan só a ubicación inadecuada da planta de REGANOSA no interior da ría obriga aos barcos gaseiros a navegar pola canle sen manter as cotas de seguridade que esixe a normativa. Paradoxicamente, REGANOSA instalouse no interior da ría grazaa a un informe favorábel emitido no ano 2001 pola Autoridade Portuaria indicando daquela que non existían problemas de navegación ou seguridade. Hoxe, despois que 70 grandes gaseiros descargasen en REGANOSA a mesma Autoridade Portuaria descobre as dificultades para o tránsito dos gaseiros.

O alto custo da operación, 175.000 euros para 2.500 m³ de dragado, fainos sospeitar que os volumes dragados poidan ser moi superiores ás cantidades declaradas no EIA.

Por todo isto, ADEGA denunciará perante a Unión Europea esta agresión á Rede Natura.

Máis información:

Humberto Fidalgo, vicepresidente de ADEGA-Ferrolterra. Tel.: 666175501