Lugo, 27 de xuño de 2012. Nos vindeiros meses ADEGA, grazas á colaboración da Área de Cultura e Turismo da Deputación Provincial de Lugo, desenvolverá varias actividades dentro da segunda edición do proxecto “Cultura e Territorio”, que se enmarca na campaña “Ponte no medio. Móvete polo territorio”. Esta campaña pretende dar resposta a estas accións contra o noso patrimonio cultural e ambiental e está baseada na información contrastada e na procura de solucións e propostas realmente sostibles e equilibradas de respecto cara o entorno.
|
Ler máis...
|
25 de xuño de 2012. Pasou unha cimeira da Terra case desapercibida entre rescates, recapitalizacións e primas de risco. Comparado con Río-92, o balanzo é decepcionante: sen compromisos concretos, sen obxectivos claros, sen orzamentos... só un texto ambiguo para salvar a cara aos “líderes” mundiais que iso sí, fronte aos inmensos problemas ambientais do planeta, “toman nota”. Coa “economía verde” como novo produto estrela do capitalismo, para vendernos un crecemento (segundo eles) máis ecolóxico, eficiente e socialmente xusto como único sistema para relacionármonos co planeta, faise evidente a fractura entre os gobernos e a sociedade. O fracaso de produtos similares como a “Revolución verde” propugnada hai 40 anos pola FAO, pola que a intensivización da agricultura, a industrialización e os transxénicos ían acabar coa fame no mundo, fan evidente que quenes son parte do problema non poden propoñer solucións. Le o artigo de Adela Figueroa “Rio+20, máis promesas que realidades”.
|
Ler máis...
|
21 de xuño de 2012. O noso patrimonio natural máis valioso esmorece pola inoperancia e o desleixo da Xunta. A penúltima aldraxe, no concello de Palas de Rei, acumula ademais varias ilegalidades: unha plantación de eucaliptos sobre chan agrario queimado hai menos de 2 meses (incumprindo a Lei 3/2007 de prevención e defensa contra os incendios) e nunha área na que están presentes endemismos botánicos como a Armeria merinoi, a Santolina melidensis ou o Iris boissieri, os tres catalogados como "en perigo de extinción" (incumprimento da Lei 9/2001 de conservación da natureza). Por riba, a zona figura na proposta da Xunta para ser incluida na Rede Natura 2000, ampliando o LIC do Careón. Cando esta ampliación chegue, os eucaliptos terán derramado os valores naturais desta área e a Xunta, unha vez máis, será cómplice da política de feitos consumados e terra queimada.
|
Ler máis...
|
15 de xuño de 2012. ADEGA vén de denunciar a incorrecta xestión de dous espazos costeiros, a praia e dunas da Corna e a praia de Coroso. Na Corna, o concello de Ribeira levou a cabo unha "limpeza" da praia con maquinaria pesada. Neste areal aniña unha ave ameazada, a píllara das dunas ( Charadrius alexandrinus) cuxa principal ameaza é o turismo desordeado, e que este ano estrea Plano de Conservación. Tamén en Coroso (Ribeira) as dúas parellas que aniñaron este ano perderon súas postas tras outra limpeza mecánica da praia. Voltando á Corna, o concello da Pobra procedeu tamén a desbrozar as pasarelas sobre as dunas, eliminando fora endémica en perigo de extinción e invadindo cos tractores hábitats de protección prioritaria (Directiva 92/43 CEE). Dáse a circunstancia que ambos areais ostentan o distintivo da Bandeira Azul, marca comercial que pouco ten que ver coa conservación dos ecosistemas costeiros senón máis ben coa propaganda turística dos concellos.
|
Ler máis...
|
|
27 de xuño de 2012. Logo de ter denunciado diante da Fiscalía e da Comisión Europea as irregularidades cometidas pola Xunta e o Ministerio no dragado da ría de Ferrol, o Valedor do Pobo vén de achegar a ADEGA unha información chave que demostra até onde chega a chafallada administrativa neste asunto. O Valedor destapa un informe técnico do Servizo de Conservación da Natureza (2,87 MB) reiteradamente ocultado pola Xunta, que considera o dragado "ambientalmente incompatible coa conservación dos hábitats e especies presentes", nunha área (LIC Costa Ártabra) parte da Rede Natura 2000. Primeiro, Xunta e Portos aproban un proxecto sen os informes preceitivos. Logo de comezadas as obras a Xunta cociña unha autorización ambiental para "salvar a cara" baseada nun suposto informe técnico, documento que non figura no expediente. E finalmente, coas obras xa rematadas aparece o devandito informe que, curiosamente, recomendaba a non execución da obra polos seus impactos sobre hábitats e especies en perigo de extinción.
|
Ler máis...
|
21 de xuño de 2011. En vésperas do remate do curso escolar, en ADEGA queremos sumarnos á denuncia sobre o estado do ensino, en particular sobre a situación da Educación Ambiental nas escolas de Compostela. Nestes centros, aos recurtes estatais súmanse os locais, xa que dende fai meses e durante todo o curso escolar a piques de rematar, véñense acumulando retrasos e anulando programas. É o caso do Programa de Educación Ambiental desenvolvido por ADEGA durante 10 anos nos centros educativos do concello. Alén disto, o concello de Compostela tenta silenciar o traballo feito até o de agora, xa que o programa anunciado este martes 19 pola responsábel da área de Medio Ambiente como "programa educativo ambienta"l no IES Xelmirez I, xa foi desenvolvido por ADEGA dende o 2003 até o 2007 en varios centros de ensino coa denominación de “Hortos escolares”.
|
Ler máis...
|
O pasado 16 de xuño de 2012 celebrouse no Centro de Educación Ambiental de O Rexo (Allariz) o VIII Encontro de Voluntariado do Proxecto Ríos. Como en anteriores ocasións convidouse ao voluntariado participante a compartir as súas experiencias sobre os traballos que realizan dentro do Proxecto Ríos e a gozar dun día de encontro e esparcimento ao carón dun río e espazo privilexiados. A xornada deu comezo ás 10:30 da mañá cunha presentación por parte do Concelleiro de Medioambiente de Allariz, Bernardo Varela, logo da entrega do material das xornadas aos asistentes. Bernardo Valera falou da importancia dos ríos para a vila de Allariz e do compromiso e necesidade do voluntariado ambiental para a conservación do río Arnoia que atravesa esta fermosa vila.
|
Ler máis...
|
14 de xuño de 2012. A OMS vén de elevar a consideración dos fumes dos veículos diesel, de posible carcinóxeno humano (grupo 2A) a carcinóxeno certo (grupo 1) equiparándoos deste xeito a outras substancias e elementos canceríxenos como amianto, o benceno ou as radiacións solares. Un dos principais elementos contaminantes que conteñen os fumes dos veículos a motor, nomeadamente dos diesel, son as partículas (PM10 e PM2,5, as máis nocivas). O catedrático Ramón Varela, experto en contaminación atmosférica, aponta ás altas concentracións de partículas nas vilas galegas, que neste inverno mesmo chegaron a superar en numerosas ocasións os límites legais. Informe PARTÍCULAS GALIZA 1º trimestre 2012(4.09 MB) (Ramón Varela Díaz)
|
Ler máis...
|
|