Lugo, 9 de febreiro de 2012. Parte da gran degradación paisaxística, biolóxica e cultural que estamos a sufrir no país é debida ás permisivas normativas forestais que ao longo dos anos favoreceron a destrución total ou parcial de grandes e pequenas superficies de carballeiras e outras masas forestais autóctonas, que logo mudaron de uso e foron transformadas en plantacións de piñeiros ou eucaliptos. ADEGA demándalle á Xunta que a nova Lei de Montes limite as cortas a feito das fragas, que non permita a súa restitución por especies de crecemento rápido e que faga cumprir a lexislación xa existente neste senso. O contrario suporía perpetuar o "franquismo forestal" en forma de máis monocultivos en detrimento da floresta autóctona e da diversidade natural e paisaxística galega.
|
Ler máis...
|
Ourense, 6 de febreiro de 2012. Neste día, constituiuse en Ourense a Plataforma Galega contra a Incineración e pola Reciclaxe, co obxectivo de unir os esforzos de todos os colectivos, organizacións, plataformas e persoas que rexeitamos a incineración como sistema para o tratamento dos residuos e defendemos as alternativas baseadas na redución, a reciclaxe e a compostaxe. Inicialmente promovida polas principais organizacións ecoloxistas galegas (ADEGA, Amigos da Terra, a FEG -18 organizacións-, SGHN e Verdegaia) a Plataforma está aberta a todos os colectivos sociais, dende partidos politicos e sindicatos a organizacións sectoriais, profesionais e por suposto ás plataformas locais que asinen o Manifesto fundacional.
|
Ler máis...
|
2 de febreiro, DÍA MUNDIAL DOS HUMIDAIS. Nesta data en 1971 adoptouse a convención Ramsar sobre os humidais. É un acordo intergobernamental para a acción nacional e a cooperación internacional en pro da conservación e o uso racional dos humidais. Os ecosistemas húmidos son a nosa riqueza natural e grazas a eles recibimos servizos por valor de millóns de euros (de xeito totalmente gratuíto). Os humidais contribúen á nosa saúde e benestar, controlando inundacións e repoñendo os acuíferos. Estabilizan costas e protexen ás cidades e vilas contra as treboadas, reteñen e exportan sedimentos e nutrientes, depuran auga e son grandes reservorios de biodiversidade. No entanto, a Xunta, nas vésperas deste Día Mundial dos Humidais, ofreceu ao mundo un pésimo exemplo de xestión destes sensibles ecosistemas coa desfeita da Frouxeira. Fronte á incompetencia da administración, ti podes colaborar ao coidado dos humidais: ESTE 2 DE FEBREIRO, MÓLLATE POLOS HUMIDAIS CON ADEGA! CROMOS DA XORNADA
|
Ler máis...
|
Valdoviño, 30 de xaneiro de 2012. Os recentes feitos acontecidos na lagoa da Frouxeira, que esta mañán desaugábase de xeito "espontáneo" pola acción do océano e dos bulldozers mentres a Xunta teimaba en construir unha canle artificial noutro punto, reflicten perfectamente á actuación da administración neste caso: Improvisación, incompetencia, a chafallada como norma, ocultación de información, falta de respecto polas leis e o Parlamento... Nas vésperas do Día Mundial dos Humidais (2 de febreiro), a Xunta está a ofrecer ao mundo un pésimo exemplo de xestión destes sensibles ecosistemas e retrátase como o principal factor para a degradación dos nosos humidais. Así as cousas, e como xa reclamara a 36 Asemblea de ADEGA hai unhas semanas, Feijóo debería considerar a supresión da Dirección Xeral de Conservación e o cese dos seus responsábeis: cando menos as desfeitas que provoquen non se pagarán con cartos públicos.
|
Ler máis...
|
|
Compostela, 8 de febreiro de 2012. Representantes das ANPAS de Lugo e dos colectivos APDR e ADEGA vímonos de reunir co subdirector xeral de sstemas informáticos da Consellaría de Educación, Carlos Vázquez, para trasladarlle a proposta de substituir o acceso a internet vía "wifi" por cabo nas aulas do proxecto Abalar. A exposición continuada das persoas á radiación electromagnética, particularmente dos nenos e nenas en idade escolar através dos móbiles e do sistema "wifi", pode causar graves danos á saúde como recoñece a Axencia Internacional de Investigación do Cancro (IARC), dependente da Organización Mundial da Saúde. O propio Consello de Europa recomendou en maio de 2011 tomar medidas urxentes para reducir a exposición a este tipo de radiacións. Temos a oportunidade de, mediante uns pequenos cambios, facermos unhas aulas máis saudábeis para as nosas crianzas. Non é esta unha obriga de toda administración pública? Solicitude_ESCOLA_SEN_WIFI (408 Kb)
|
Ler máis...
|
4 de febreiro de 2012. A Comisión 7ª do Parlamento Galego vén de rexeitar unha proposición non de lei apoiada polos grupos da oposición para instar á Xunta a declarar o Monte Pindo Parque Natural. Desatendendo unha vez máis o criterio de numerosos científicos, profesores universitarios, veciños e ducias de colectivos sociais e sectoriais, o PP volve a impedir que este singular espazo teña a protección que merece, e que esta protección acompáñese de medidas para beneficiar a veciñanza e dinamizar a Costa da Morte. Resulta irónico que o mesmo día que o PP rexeita esta proposta, a Xunta aprobe a "Estratexia Galega da Acuicultura" para permitir a Pescanova arramplar con Touriñán e dea o visto bó definitivo a 3 minicentrais de Villar Mir no Xallas. Eis o "desenvolvemento sustentábel" de Feijóo: frear as iniciativas respectuosas para entregar logo o noso patrimonio natural aos amigos. MANIFESTACIÓN NACIONAL O 14 DE ABRIL POLO PINDO
|
Ler máis...
|
31 de xaneiro de 2012. Este pasquín estase a repartir pola comarca do Irixo onde se pretende construir a incineradora do sur. Semella que o gabinete de comunicación da Xunta decantouse polo "low cost" e o ridiculismo. Como estratexia para reforzar a oposición á incineración, é impagábel. Failles caso: colabora e difúndeo entre os teus contactos! A incineración vai acabar coa fame no mundo!
|
26 de xaneiro de 2012. As brutais obras para o "baleirado controlado" que están sendo perpetradas pola Xunta na lagoa da Frouxeira, Humidal de Importancia Internacional, LIC, ZEPA e ZEPVN, constitúen un auténtico atentado ecolóxico. Como é posíbel que unha administración, supostamente responsábel deste espazo, poida desentenderse durante 2 anos da súa xestión, incumprindo as súas obrigas de conservación sinaladas nun acordo unánime polo Parlamento, cando foi pola súa neglixencia que a lagoa sufíu as consecuencias? Como pode entenderse que para solucionar un problema creado pola súa incompetencia, agora a Xunta volte meter as escavadoras neste espazo protexido? Perante estes feitos, ADEGA apela ás instancias internacionais titoras do espazo, á oficina Ramsar e á Comisión Europea, para que miren pola conservación deste humidal, patrimonio natural galego, europeo e mundial, que nestes intres está sendo agredido pola Xunta.
|
Ler máis...
|
|