Nas actividades previstas para esta campaña de Outono do Proxecto Ríos, continuaremos co programa de Voluntariado en Ríos do Ministerio de Medio Ambiente e Medio Rural e Mariño, que comezou hai tres anos. Este ano, dacordo cos datos recollidos no informe do campo, realizados entre 2007 e 2010, desenvolveremos traballos de eliminación de flora exótica invasora, ademais de roteiros polo río Tea. O voluntariado terá cubertos os gastos de desprazamento, aloxamento e manutención.

Os traballos consistirán na erradicación de diversas especies invasoras presentes en diferentes treitos do río Tea, as especies a erradicar son plántulas de dúas árbores (Acacia dealbata e Acacia melanoxylon) coñecidas vulgarmente como mimosas, a falsa acacia (Robinia pseudoacacia) e pequenas matas do falso bambú (Phyllostachys spp.). Ademais se actuará nunha herbácea provinte de América (Conyza canadensis), a tintureira ou uva das américas (Phytolacca americana), o garrapatón (Bidens frondosa) e a Tradescantia fluminensis coñecida co nome de herba da fortuna.

Nas xornadas de traballo explicaranse de maneira práctica os pasos a seguir para que o voluntariado poida levar a cabo os traballos axeitadamente e desenvolver así o programa.

Cos datos recollidos realizarase un Informe do Estado de Especies Invasoras do Río Tea, que se presentará ao Ministerio de Medio Ambiente Medio Rural e Marino, á Confederación Hidrográfica do Norte, Consellería de Medio Ambiente e outras entidades.

Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo