Cunchas de mexillón para o desenvolvemento do material de construción

Carolina Martínez García, Belén González Fonteboa e Diego Carro-López

CERNA Nº 86 - Especial Vaga eólica II

Páx. 18-22

Proxecto Biovalvo, desenvolvido polo Grupo de Construción da Universidade da Coruña (UDC) e coa participación de diversas empresas, incluíu entre os seus obxectivos a aplicación das cunchas de mexillón como biomaterial de construción para o seu uso en diferentes aplicacións, sexa como áridos para a fabricación de formigóns en masa ou para morteiros de revestimento, sexa como material de recheo solto para illamento térmico e acústico. Este artigo amosa un breve resumo da investigación levada a cabo, xa defendida como tese de doutoramento na UDC. Conclúese que é viable e de grande interese utilizar a cuncha de mexillón nestas aplicacións, podendo substituír entre o 12 e o 50% dos áridos convencionais en formigóns e morteiros e completamente no caso dun material illante.

Zosteco: Proxecto participado para a xestión sustentábel da Enseada de San Simón

Emilio Fernández, Carlota Barañano, Gonzalo Méndez, Jone Molina, Aida Ovejero, Jesús Troncoso, Pablo Urbieta e Sebastián Villasante

CERNA Nº 86 - Especial Vaga eólica II

Páx. 23-26

roxecto ZOSTECO “Conservación das pradarías de Zostera no noroeste da Península Ibérica: unha investigación baseada na cartografía participativa de usos e servizos ecosistémicos” xurdiu coa vontade de combinar o coñecemento académico e o tradicional e así dar resposta á necesidade de conciliar a preservación dos hábitats da Enseada de San Simón coas diferentes actividades humanas que se desenvolven na área de estudo.

"Riqueza nacional e benestar social. Máis desenvolvemento con menos crecemento"

Crítica de Manuel Soto ao libro de Albino Prada Blanco

CERNA Nº 86 - Especial Vaga eólica II

Páx. 27-28

"Riqueza nacional e benestar social. Máis desenvolvemento con menos crecemento". O obxectivo principal do libro foi o de proxectar un roteiro válido en escala mundial sobre que nivel de crecemento é compatible coa sustentabilidade global do planeta ao par dunha inclusividade e desenvolvemento sociais satisfactorios. O autor, Albino Prada, é doutor en Ciencias Económicas pola USC e profesor de Economía Aplicada na Universidade de Vigo. Presentamos neste artigo un resumo dos seus contidos, xunto cunhas pinceladas críticas.

A contaminación plástica dos nosos mares e océanos. Unha visión desde Galiza

Jesús Gago Piñeiro

CERNA Nº 86 - Especial Vaga eólica II

Páx. 29-30

Nos úlltimos anos a comunidade científica internacional alertou sobre a problemática ambiental relacionada co aumento dramático da entrada e persistencia de materiais plásticos no medio mariño. A presenza de plásticos no ambiente é algo habitual. Basta dar un paseo por calquera praia ou paraxe natural para atopalos en diversas formas e tipos, desde botellas de auga ata bolsas.

Principais resultados do proxecto 1MARDEALOSAS

David José Nachón, Rufino Vieira-Lanero, Sandra Barca Bravo, Alejandro Pico, María del Carmen Cobo e Fernando Cobo

CERNA Nº 86 - Especial Vaga eólica II

O sábalo e a saboga son dúas especies migratorias anádromas, con reprodución fluvial e fase de crecemento mariño, onde pasan a meirande parte da súa vida. A pesares da importancia desta fase, aínda se descoñecen moitos aspectos, como de distribución bioloxía e ecoloxía. Para paliar este déficit xorde o proxecto 1MARDEALOSAS.

A diversidade de aves ao longo de 37 anos no Courel

María Losada, Luis Salaverri, José Guitián e Mar Sobral

CERNA Nº 86 - Especial Vaga eólica II

Páx. 35

As aves son excelentes indicadores de biodiversidade porque as tendencias das súas poboacións son moi sensibles aos cambios ambientais. O estudo do artigo explora como a diversidade de aves cambiou entre 1977 e 2014, en 5 sitios das montañas do Courel. Atopa que o número de especies de aves non cambiou despois de 37 anos, aínda que oito especies variaron na súa abundancia. Así, o estudo amosa que as aves poden manterse en áreas naturais ben conservadas.