Buscador
O debate eólico
Daniel López Vispo
CERNA Nº 60 - Sentenzas Xudiciais: Caso Rinlo
Páx. 24 - 25
Os anos 60 é a data clave para entender as novas políticas enerxéticas na Galiza, a época dos encoros e os espolios dos principais recursos da terra. Mais é a partires da década dos 90 cando a enerxía eólica fai a súa gran aparición. O que parecía ser o achado do século, é dicir, o aproveitamento dunha enerxía renovábel tornouse no sometemento aos ditames das grandes empresas, sen que exista o máis mínimo respecto polo medio nin natural nin patrimonial. A substitución das enerxías “tradicionais” polas renovábeis é o paso lóxico a seguir, pero son precisas unha serie de garantías que a aseguren o bo seu desenvolvemento. O presente artigo fai un repaso polas políticas dos últimos anos por parte da Xunta en canto a enerxía eólica, os seus acertos e carencias, e como estas afectan ao medio ambiente.
Enerxía eólica e Rede Natura 2000 en Galiza
Xavier Simón Fernández e Damián Copena Rodríguez
CERNA Nº 60 - Sentenzas Xudiciais: Caso Rinlo
Páx. 26 - 29
No actual contexto económico capitalista a problemática do cambio climático aparece como un dos principais problemas ambientais, facendo que nas derradeiras décadas a utilización de fontes enerxéticas renovábeis comece a xeneralizarse. Neste contexto, a enerxía eólica aparece como unha importante alternativa aos combustíbeis fósiles. O noso País non ficou alleo a esta realidade, e nos últimos 15 anos a produción de enerxía eólica pasou de ser unha actividade case anecdótica, a converter a Galiza nunha potencia eólica europea e mesmo mundial. Este feito, apoiado polo marco regulador autonómico, supuxo a instalación de múltiples aeroxeradores ao longo de moitos dos cumios do territorio galego. Se, por unha parte, permiten producir electricidade que non contribúe ao cambio climático, por outra, segundo sexan os espazos que ocupan as instalacións dos parques eólicos, pode resultar agresiva ambientalmente. Neste artigo repásase brevemente o tratamento ambiental dos parques eólicos na normativa autonómica reguladora desas instalacións e faise un repaso dos seus principais impactos ambientais, facendo especial mención á afectación directa aos ecosistemas de interese ecolóxico e a espazos pertencentes á Rede Natura 2000.
Contaminación por fluoruros no contorno de Alcoa, San Cibrao
Luís Díaz Cabanela
CERNA Nº 60 - Sentenzas Xudiciais: Caso Rinlo
Páx. 30 - 32
Diferentes análises realizadas nos arredores da factoría de aluminio ALCOA-INESPAL de San Cibrao (Lugo) amosan unha alta contaminación por fluoruros. O fluoruro de calcio é utilizado como electrólito e o fluoruro de sodio como fundente na fabricación de aluminio. Neste artigo amósanse os niveis da presenza deste contaminante nos diversos ecosistemas da zona.
A vía primitiva a Compostela
Ricardo Polín
CERNA Nº 60 - Sentenzas Xudiciais: Caso Rinlo
Páx. 33 - 34
O auxe das autoestradas fai que hoxe en día os camiños xa non unan pobos, senón que unen capitais. Por iso, a conservación do Camiño de Santiago, nas súas distintas manifestacións, é un tesouro que nos resta da lóxica dos que viviron antes que nós. A simbiose destes antigos trazados coa natureza e os núcleos primixenios fai que, para o camiñante, percorrer estes camiños sexa como transportarse a outra época e proporciona a oportunidade de experimentar o entorno dun xeito distinto. Por todo isto, a protección do Camiño e dos bens, tanto naturais como patrimoniais, que o acompaña é o xeito de garantir a súa preservación por mil anos máis.
Entrevista a Ulf Helke
María García
CERNA Nº 60 - Sentenzas Xudiciais: Caso Rinlo
Páx. 35 - 36
“25 anos da caída do Muro de Berlín: unha perspectiva ecolóxica”O pasado 9 de novembro cumpríronse 20 anos dende a caída do Muro de Berlín, un acontecemento histórico a escala mundial que mudou radicalmente o contexto político e socioeconómico de grande parte do planeta. Ás moitas revisións e interpretacións, quixemos sumarlle a nosa particular análise: que repercusións tivo no medio ambiente a caída do Muro e a reunificación de Alemaña? Entrevistamos a Ulf Helke, biólogo e activista ecoloxista da antiga Alemaña Oriental.
CMVMC Santo Estevo de Parga: Unha maneira de sacarlle o proveito aos montes
David Díaz Losada
CERNA Nº 60 - Sentenzas Xudiciais: Caso Rinlo
Páx. 37
Traio aquí un exemplo de como sacarlle o máximo proveito aos nosos montes, establecendo un plan racional de aproveitamento e traballo programado para os mesmos. A parroquia de Santo Estevo de Parga, Concello de Guitiriz, atópase situada na parte norte da provincia de Lugo, bañada na meirande parte polo río Parga, por certo, moi rico en troitas. Ten unha poboación aproximada de 800 habitantes e unhas 200 casas que forman a Comunidade á que lle dá o nome a parroquia, cos seus oito pobos máis a vila de Parga. A parroquia de Santo Estevo ten unha extensión de aproximadamente 1.000 Has de monte veciñal man común, das que 375 Has foron clasificadas polo Xurado Provincial de Lugo con data 25 de Agosto de 1.975. As restantes, atópanse repartidas entre comuneiros e comuneiras desde hai 80 anos, sen criterio de proporcionalidade. Así que, para centrármonos no tema que nos ocupa imos falar só do monte legalmente clasificado, no que existen varias canteiras de granito desde 1979.
.gif)
Avenida de Castelao, 20-Baixo 15704 Santiago de Compostela
Tlf/Fax: 981 570 099 Email:cerna@adega.gal
Edición: Ronda Fontiñas, 180 Entrechán. 27002 Lugo
Tlf: 982 240 299 Email: cerna@adega.gal