ADEGA

Inicio / Novas / ADEGA Nacional / Loita contra a invasión eólica, o eucalipto, a...

28-03-2022

Loita contra a invasión eólica, o eucalipto, a incineración do lixo e a emerxencia ambiental global: retos de ADEGA en 2022

A 46ª Asemblea Xeral de ADEGA celebrouse onte no Pazo da Peregrina de Bertamiráns (Ames) e culminou coa entrega dos Premios Osíxeno e Dioxina de 2020 e 2021.


A Asociación ecoloxista ADEGA celebrou onte a súa 46ª Asemblea Xeral de socios e socias na que fixo balanzo do traballo de 2021 e na que tamén acordou as liñas estratéxicas da organización durante 2022. Os socios e socias de ADEGA determinaron manter latente a mobilización social e a ofensiva ecoloxista contra a actual avalancha de proxectos eólicos que ameazan o territorio, así como reforzar a acción xurídica fronte aqueles que resulten máis prexudiciais para o medio galego. Tamén acordou dar continuidade á súa campaña de defensa do monte galego fronte o monocultivo do eucalipto e doutras especies exóticas invasoras e apoiar decididamente ás comunidades veciñais de montes comunais, actualmente acosadas pola administración pública.

Outra das principais liñas de traballo de ADEGA durante 2022 será a de promover unha xestión responsábel dos residuos sólidos urbanos vinculada a un novo modelo de consumo que prime a redución de lixo, a reciclaxe e a compostaxe fronte a incineración e o vertido de SOGAMA. Galiza segue á cola en recollida separada e reciclaxe no Estado, incumprindo os obxectivos para 2020 e sen perspectivas de mellorar para 2025 e 2030.

Por último, ADEGA pon a andar unha nova comisión de traballo baixo o nome de “Emerxencia ambiental global” que se encargará de analizar no seu conxunto a crise ambiental global que estamos a vivir e coa que está relacionada unha persa progresiva de dereitos básicos da sociedade como a sanidade, educación, a vivenda, alimentación ou auga de calidade. ADEGA aposta por políticas destinadas a acadar a soberanía enerxética e alimentaria, e por un desenvolvemento do territorio vencellado co decrecemento na demanda de produtos, co aforro e a eficiencia no consumo de recursos.

Propostas de resolución aprobadas

As socias de ADEGA aprobaron varias propostas de resolución, entre as que se recoñeceu a importancia e papel histórico, social e ecolóxico das comunidades de montes veciñais en ma común e se alentou a apoiar a Iniciativa Lexislativa Popular (ILP) promovida pola ORGACCMM na defensa deste tipo de montes únicos e singulares en Galiza fronte as intencións da Xunta de facelos desaparecer. Tamén se apelou á derrogación das leis de depredación, impulsadas e aprobadas polo PP, e ao amparo na Comisión Europea para a restitución dos dereitos cidadáns que se están a vulnerar durante a actual vaga eólica. ADEGA instou ao goberno galego a derrogar tamén o Plan Eólico vixente e a deseñar unha nova planificación enerxética racional e integral, acorde coas necesidade e capacidades enerxética do  país, e compatible coa vida no rural e coa preservación da biodiversidade, o aforro, a eficiencia e a autosuficiencia enerxética.

No décimo aniversario da última proposta de ampliación da Rede Natura 2000, ADEGA non puido obviar a reclamación, unha vez máis, da ampliación da rede de espazos naturais protexidos de Galiza con carácter urxente e cando menos co obxectivo de duplicar a superficie actualmente protexida.

Por último, a organización ecoloxista avogou pola retirada inmediata do exército ruso e o cese dos combates na Ucraína (e en calquera outra parte do mundo) e á volta á vía diplomática como único camiño de resolución do conflito. ADEGA tamén denunciou a hipocrisía do Estado español, da UE e da OTAN ante esta guerra  bélico e acusou ao goberno de Sánchez de entregar o Sáhara a Marrocos.

Aos actos públicos da 46ª Asemblea Xeral de ADEGA asistiron como convidados varios representantes da corporación municipal de Ames e das organizacións BNG, PSOE, Anova, CIG, A Mesa e Galiza Nova.

Entrega de premios Osíxeno e Dioxina 2020 e 2021

No seu 46 aniversario, ADEGA tamén fixo entrega dos seus Premios Osíxeno e Dioxina correspondentes ás anualidades 2020 e 2021. A pandemia impedíralle o ano pasado outorgar estes galardóns presencialmente, polo que fixo confluír nun único acto a entrega dos premiso da vixésima e vixésimo-primeira edicións. Acudiron a recoller os galardóns todos os premiados e premiadas cos premios Osíxeno de Honra, Osíxeno Individual e Osíxeno Colectivo de 2020 e 2021. Estes galardóns, obra cerámica do artista galego Nacho Porto, recoñecen as mellores accións ou as actitude máis positivas para a preservación ambiental de Galiza, ou aquelas traxectorias vitais comprometidas co medio ambiente de Galiza, no caso dos premios honoríficos.

En 2020 foron recoñecidos con estes galardóns: o ilustrador, humorista gráfico e guionista Calros Silvar (Honra); o ecoloxista Fernando Malvar de A Rente do Chan-PLADEVER (Osíxeno Individual) e a plataforma “Salvemos O Iribio” (Osíxeno Colectivo), que estivo representada no acto polo artista Xoán Andrade.

En 2021 levaron os premios Osíxeno de ADEGA: Fernando Cobo, profesor de zooloxía na USC e ex-director da Estación de Hidrobioloxía de Vilagarcía (Osíxeno de Honra); Aranza González, presidenta de Aire Limpo Nas Mariñas Mandeo (Osíxeno Individual); e a Asociación para a Defensa da Ría-APDR (Osíxeno Colectivo), que estivo representada no acto polo seu presidente, Antón Masa.

Parcelas custodiadas nas ribeiras do Sar

Tras o xantar, as socias e socios de ADEGA, acompañados por Manuel Lens, concelleiro de Medio Ambiente de Ames, e David Santomil, concelleiro de Educación de Ames, fixeron unha visita de recoñecemento das parcelas recentemente adquiridas por ADEGA e pola Fundación Eira nas beiras do río Sar, á altura de Ponte Cabirta. Unha vez alí realizouse unha plantación simbólica de árbores como símbolo do inicio da custodia ambiental da zona.

Ligazóns

Descargas

ADEGA / Asociación para a defensa ecolóxica de Galiza
Avenida de Castelao, 20-Baixo 15704 Santiago de Compostela
Tlf/Fax: 981 570 099 Email: adega@adega.gal