03-12-2021

ADEGA organiza un encontro sobre a sustentabilidade na xestión do monte no Sobreiral do Arnego

O sábado 18 de decembro, a Asociación para a Defensa Ecolóxica de Galiza (ADEGA), organiza un encontro subvencionado pola Deputación de Pontevedra baixo as axudas dirixidas a entidades sen fins de lucro para a realización de actividades culturais. A actividade contará tamén co apoio do concello de Agolada.

O encontro terá por título, Xestión sustentábel do monte: caso do Sobreiral do Arnego. Dos vellos usos ás novas estratexias de conservación, e terá lugar na Casa da Cultura de Agolada.

Será en sesión de mañá e tarde; pola mañá haberá unha mesa redonda sobre a multifuncionalidade do monte na que se debatirá sobre os usos e posibilidades do monte dende o punto de vista social, ecolóxico e económico, poñendo por caso tamén o Sobreiral do Arnego.

Na segunda parte da mañá expoñerase o traballo que a asociación ADEGA ven realizando nas parcelas nas que teñen acordos de custodia do territorio.

Na sesión de tarde realizarase unha visita guiada ao Sobreiral de Arnego na que ADEGA dará a coñecer as actuación a desenvolver e se destacarán os valores ecolóxicos e usos culturais tradicionais da saca da cortiza.

Dende marzo de 2016, ADEGA ten un acordo de custodia do territorio coa familia propietaria da parcela coñecida como A Zarra da Pena na que dende esa data se están a realizar actuacións de divulgación e conservación dos seus valores naturais entre as que están;
eliminación de especies exóticas invasoras, seguimento de morcegos, recuperación de valados ou a creación dunha ruta coa instalación de panelería informativa.

Programa do encontro

Sesión da mañá     

• 10.30h Presentación do Encontro    
• 11.00h Monte multifuncional e necesidades rurais Jesús de la Fuente    
• 11.30h O Sobreiral do Arnego Cristina Gende    
• 12.30h Descanso    
• 13.30h A custodia do territorio como ferramenta de conservación  Ramsés Pérez    
• 14.00h Actuacións de conservación ambiental, Paco Bañobre

Sesión da tarde   

• 16.00h Visita ao Sobreiral do Arnego   
• 18.00h Recollida de landras   
• 18.30h Remate do Encontro  

A participación na sesión da maña e na actividade da tarde é gratuíta pero precisa inscripción

Mail: pacobanhobre@adega.gal Móbil: 616 23 80 50

Descargas

• Cartaz do Encontro