17-12-2023
Na porta de entrada á comarca dos Ancares dende Lugo comezamos en Baralla un percorrido duns 14 quilómetros dende a Ponte de Senra, na área fluvial da vila (481 m.). Pola beira dereita do río Neira subiremos cara a aldea de Matela (770 m.) onde xantaremos.
A altura máxima do concello está no Rañadoiro (1.101 m.), serra na que andaremos pola súa parte sur. É aquí onde está a pena Dubio que dá nome a este percorrido.
O río Neira nace na Fontaneira (concello de Baleira) a 940 m. de altitude. Descende polos vales de Neira de Rei e Neira de Xusá onde a vila de Baralla continuando polo concello de Láncara ata a súa desembocadura no Miño percorrendo en total 56 quilómetros.
Iniciando o percorrido pola beira do Neira veremos o vello muíño da Casa da Granxa da aldea próxima de Arroxo (1750) que aproveitaba ata 1985 as augas do río Vilachambre (que pretiño chega ao Neira).
Seguimos cara á aldea de Escobio que está a poucos metros e colleremos o camiño pola beira do Neira pasando entre castiñeiros centenarios. O bosque de vexetación autóctona acompañaranos todo o camiño aínda que algúns eucaliptos e piñeiros mancharán a paisaxe (especialmente nos lugares máis altos).
O caneiro da Pena de Escobio no mesmo río foi lugar de reunión para o baño ata hai ben pouco cando unha riada levou boa parte do caneiro que non foi recuperado.
Seguindo o camiño á beira do río temos o Pozo de Baño, un caneiro cunha fervenza, tamén aproveitado para lugar de baño, Freixós cun novo salto de auga e remanso. Todos estes lugares viñan asociados a canles de regadío.
A autovía A-6 vainos acompañando e facéndonos lembrar que debera ter sido construída paralela á NVI sen ter afectado ao canón do río Neira como no seu momento foi demandado por parte de ADEGA e a veciñanza de Neira de Rei.
De xeito máis forte iniciamos o ascenso cara Matela á altura do Pozo Negro e pasando polo monte de A Raseliña, un camiño cheo de prados en uso.
Chegados xa a Matela xantaremos na vella Escola a carón da capela de San Xosé.
Logo de recuperar forzas baixaremos desta volta a media ladeira ata a Pena Carramedo dende onde gozaremos dunhas vistas da Serra do Rañadoiro e máis co canón do río Neira.
De volta a Escobio só nos falta camiñar polo paseo até a área fluvial da vila pero, desta volta pola marxe esquerda.
Os Roteiros de ADEGA-Lugo son andainas pola Natureza que organiza a delegación de Lugo da organización ecoloxista ADEGA desde hai máis de 20 anos e que están dirixidas á poboación de todas as idades, co obxectivo principal de achegar as persoas á súa contorna natural para que coñezan os valores naturais, patrimoniais e culturais que enriquecen e identifican o noso territorio.
O seguintes roteiros deste curso 2023/24 son:
Na propia bitácora de Roteiros de ADEGA-Lugo (http://roteirosadegalugo.wordpress.com) irase actualizando toda a información relativa a cada saída e as indicacións para formalizar a reserva.
As persoas que estean interesadas en reservar praza, terano que facer a través do formulario de reserva antes das 13h do venres anterior ao roteiro. Cubriranse as prazas por orde de inscrición.
Os roteiros de ADEGA-Lugo están abertos á participación de público de todas as idades aínda que os socios e socias de ADEGA gozarán de desconto no prezo, así como as persoas que están estudando, en situación de desemprego ou os menores de 14 anos.
ADEGA / Asociación para a defensa ecolóxica de Galiza
Avenida de Castelao, 20-Baixo 15704 Santiago de Compostela
Tlf/Fax: 981 570 099 Email: adega@adega.gal
