Buscador
A destrución que non cesa
Alfonso de Lanzós
Páx. 12
Alfonso de Lanzós elabora unha metáfora coa famosa obra de Stevenson Dr. Jeckyl e Mr. Hyde para explicar a dobre personalidade do Ministerio de Medio. Neste símil a Demarcación de Costas convértese nun monstro terrible que destrúe todo o que atopa ao seu paso, deixando unha pegada de cemento en lugares tan emblemáticos da paisaxe galega como é a costa de Lugo.
Explotación de áridos calizos en Triacastela: A devastación do Patrimonio de Galiza
Miguel A. Freire
Páx. 13
O concello de Triacastela posúe un gran patrimonio, sobre todo no terreo da arqueoloxía e a paleontoloxía. Esta é unha zona onde abundan as cavidades naturais que consistían no principal agocho, tanto para homes como para animais, en época prehistórica. Entre todos estes refuxios destaca Cova Eirós, principalmente polos importantes achados arqueolóxicos e paleontolóxicos que se teñen realizado nas distintas campañas. Mais todo este patrimonio estase a poñer en perigo por mor das canteiras de pedra caliza no Monte Penedo por parte da empresa cementeira Cementos Cosmos S.A.
Reganosa: a loita que non cesa
Belén Rodríguez
Páx. 14 - 16
Todo comezou en 1998 cun recheo ilegal de 60.000 m2 na ría de Ferrol, que logo pasaría a 120.000 m2, autorizados pola Autoridade Portuaria, xunto cunha recualificación de terreo. O propietario deses terreos, que despois se convertería no presidente de honra e alma máter de Reganosa, Roberto Tojeiro, pensou entón, en conivencia coa Xunta de Fraga, instalar alí unha planta regasificadora, no interior da ría, no peirao de Mugardos. O Grupo Tojeiro tería a participación do 18% do capital, Endesa e Fenosa do 21% respectivamente, a Xunta dun 10%, ao mesmo que Sonatrach e Caixa Galicia, e outro 10% estaría adxudicado para o Banco Pastor e Caixa Nova. Namentres, os sectores contrarios á localización e instalación da planta de gas en Mugardos constituíanse como grupo de oposición no Comité Cidadán de Emerxencia para a Ría de Ferrol, un colectivo formado por medio cento de entidades locais que centrou os seus obxectivos ata o día de hoxe en demostrar a ilegalidade de Reganosa, así como a súa influencia negativa sobre a seguridade das persoas e o medio ambiente. Tras nove anos de incertezas, o 2007 representa un punto de inflexión: comeza a actividade de Reganosa, en período de probas, consegue seis meses despois o permiso de actividade definitivo e descóbrese un documento no que, supostamente, a Xunta se compromete a situar a planta de gas nos terreos de Tojeiro e, polo cal,segundo o Comité, poderían ser imputados penalmente o ex presidente Fraga e o seu conselleiro de Economía, Xosé Antón Orza.
Novo Plano Acuícola Galego: as razóns do “non” ecoloxista
Fins Eirexas
Páx. 18 - 20
O pasado 4 de novembro grupos ecoloxistas, colectivos sociais, culturais e políticos reclamamos en Corrubedo a retirada do novo Plano Acuícola da Xunta por considerar que constitúe unha agresión contra os nosos recursos naturais en forma de expropiación salvaxe do litoral para beneficiar unicamente ás grandes empresas transnacionais do peixe. Este é o movemento de protesta cidadá máis importante dende Nunca Máis. Abrangue moi diversos colectivos e plataformas veciñais de toda a costa galega, apoiados e asesorados por ADEGA e outras organizacións ecoloxistas que ofrecemos soporte técnico e organizativo.
Atrancos e expectativas para a pesca de baixura e o marisqueo
Belén Rodríguez
Páx. 21
O pasado 10 de outubro na Illa de A Toxa, no marco do X Foro de Recursos Mariños e Acuicultura, organizado pola Uiversidade de Santiago de Compostela. Neste Foro, o investigador Alberte de Coo, do Centro de Investigacións Mariñas de Vilaxoán, e Carlos Gabín, do Servizo de Produción Pesqueira da Consellaría de Pesca, fixeron un repaso dos últimos dez anos do marisqueo e da pesca de baixura en Galiza. Ambos os dous sectores seguiron traxectorias moi semellantes.
Entrevista a Rubén Cela Díaz
Belén Rodríguez
Páx. 22 - 23
“O voluntariado en defensa do monte é un proxecto de toda a sociedade galega”, proporciona un bo titular para a entrevista con Rubén Cela Díaz, Director Xeral de Xuventude e Solidariedade. O voluntariado en xeral, e tamén o ambiental, constitúen un campo novo no goberno, de aí que tanto o Plan Galego de Voluntariado 2006-2010 como a Lei Galega de Acción Voluntaria serán os encargadas de xestionar as liñas de actuación do voluntariado no territorio galego. O que se pretende é fomentar a colaboración en todos os ámbitos e sobre todo no medio ambiente e a través da mocidade como impulsora. Nesta entrevista Rubén Cela dará as claves destes programas.
.gif)
Avenida de Castelao, 20-Baixo 15704 Santiago de Compostela
Tlf/Fax: 981 570 099 Email:cerna@adega.gal
Edición: Ronda Fontiñas, 180 Entrechán. 27002 Lugo
Tlf: 982 240 299 Email: cerna@adega.gal