02-02-2015

2 de febreiro, Día Mundial dos Humidais: humidais para o noso futuro!

Os humidais purifican e repoñen a auga, fornecen alimento a millóns de persoas, actúan de amortecedores das enchentes e as secas protexendo as nosas costas dos temporais. Acubillan tamén unha enorme biodiversidde e son sumidoiros naturais de carbono.

Ti podes colaborar na conservación dos nosos humidais e reverter a preocupante tendencia, xa que dende 1900 desapareceu o 64% dos humidais do planeta. Como facer?

Colaborando na eliminación das invasoras nos ecosistemas acuáticos

ADEGA vai encetar o proxecto “Rede de voluntariado ambiental para a eliminación de especies invasoras en ecosistemas acuáticos”, que conta co apoio do Ministerio de Agricultura, Alimentación e Medio Ambiente, através da Fundación Biodiversidad.

A iniciativa está centrada por unha banda no coñecemento e divulgación dos impactos das especies exóticas invasoras nos nosos ríos, charcas e humidais. Dentro desta liña traballarase a identificación de especies exóticas invasoras nos ríos e charcas de Galiza, durante as inspeccións destes ecosistemas en iniciativas como Proxecto Ríos ou Charcas con Vida.

Será tamén importante o voluntariado ambiental e a custodia do territorio para eliminación de especies exóticas invasoras, eido no que ADEGA leva anos de traballo con centos de voluntarios/as por todo o país.

Participando no inventario de ´Charcas con Vida´

O proxecto "Charcas con Vida", é unha iniciativa de voluntariado, educación ambiental e custodia do territorio encetada en 2013 e que nos levou por todo o País involucrando a unha manchea de voluntarias e voluntarios.

Charcas con Vida conta con tres liñas de acción principais: 

• Divulgación da importancia e dos valores das charcas         
• Creación dunha rede cidadá para o seu estudo e inventariado        
• Actuacións de construción e recuperación de charcas mediante acordos de custodia do territorio e voluntariado ambiental

Contamos con material educativo para a inspección de charcas e actividades que permiten coñecer a súa hidromorfoloxía e identificar a biodiversidade que albergan, tanto de fauna coma de flora, tecendo unha rede que abrangue xa a máis de 20 grupos por todo o país.

"Charcas con Vida" conta tamén cunha plataforma web con novas do proxecto e información sobre estes pequenos ecosistemas. Unha das utilidades nas que podes colaborar é o Inventario de Charcas.

Fai parte ti tamén deste proxecto!

Ligazóns

• Web de Charcas con Vida
• Wold Wetlands Day 2015

Novas relacionadas

• Novo proxecto de ADEGA sobre as Especies Exóticas Invasoras
• Día Mundial dos Humidais: Móllate e faite protagonista da súa conservación!