14-10-2026

ADEGA-Lugo presenta un recurso contra o desenvolvemento do plan parcial S5I, que afecta ás nacentes do Rato

ADEGA-Lugo emprende accións xudiciais contra a ampliación do polígono industrial proxectada sobre a cabeceira do río Rato. A asociación acadou o obxectivo mínimo de recadación necesario para defender nos tribunais este espazo natural. En concreto, a campaña “Río Rato sen cemento” contou con máis de 200 doazóns, unha resposta que, para a organización ambiental, demostra que existe unha parte importante da sociedade lucense disposta a implicarse na defensa do patrimonio natural da cidade.

O presidente de ADEGA-Lugo, Xosé Manuel Rodríguez, destacou en rolda de prensa que o resultado da campaña vai moito máis alá da cantidade recadada:“O máis importante desta campaña é comprobar que hai moitas persoas en Lugo dispostas a defender o seu patrimonio natural. Máis de 200 doazóns demostran que as nacentes do Rato importan e que existe unha sociedade activa que non quere que estes espazos sexan sacrificados para urbanizar”.

Rodríguez sinalou tamén que a campaña permitiu poñer no mapa un espazo natural pouco coñecido, pero de gran valor ambiental, e facer visible a necesidade de protexer as nacentes do Rato fronte á súa transformación.

O recurso xudicial xa foi admitido a trámite

A campaña chega a este primeiro obxectivo económico coincidindo cun avance fundamental na vía xudicial. O Tribunal Superior de Xustiza de Galiza admitiu a trámite o recurso contencioso-administrativo presentado por ADEGA o pasado 3 de setembro de 2026 contra o desenvolvemento do Plan Parcial S5-I, que afecta á cabeceira do río Rato.

A admisión a trámite do recurso supón un primeiro paso fundamental para que os tribunais revisen a legalidade dunha actuación urbanística que pode afectar de maneira irreversible a un espazo natural de elevado valor ambiental.

Un espazo natural de gran valor

As nacentes do río Rato e a súa contorna conforman un espazo de especial interese ambiental, con pequenos cursos de auga, zonas húmidas, charcas, carballeiras e bosques de ribeira que contribúen á regulación hídrica da cunca do Rato e forman parte do corredor verde que conecta este territorio co río Miño.

ADEGA advirte que a urbanización prevista no sector S5-I suporía a transformación irreversible destes terreos, coa impermeabilización do solo e a alteración dun espazo que desempeña funcións ambientais fundamentais, especialmente nun contexto de cambio climático no que a conservación das zonas húmidas, das masas forestais e das áreas de recarga hídrica resulta cada vez máis necesaria.

Defensa dunha contorna natural única fronte á especulación

ADEGA considera que o proxecto presenta graves deficiencias ambientais e de planificación e fundamenta a súa impugnación na vulneración da normativa urbanística e ambiental vixente.
Entre os principais argumentos do recurso atópanse:

• Incompatibilidade ambiental e hidrolóxica. O proxecto transforma de maneira irreversible un espazo sensible que alberga cursos de auga, zonas húmidas e masas forestais fundamentais para a recarga hídrica da conca do río Rato.
• Incremento dos riscos de inundabilidade. A ordenación proposta non garante adecuadamente a seguridade fronte aos riscos de inundación augas abaixo e non aplica con suficiente rigor as medidas preventivas establecidas na Declaración Ambiental Estratéxica.
• Falta de xustificación socioeconómica. ADEGA cuestiona a necesidade de sacrificar solo rústico e natural de elevado valor ecolóxico cando existen alternativas viables e parcelas industriais baleiras noutros polígonos xa urbanizados do municipio de Lugo.

A defensa do Rato continúa nos tribunais e na sociedade

A consecución do obxectivo económico mínimo permite dar este novo paso na defensa das nacentes do Rato. Pero a campaña «Río Rato sen cemento» tamén abriu un proceso de divulgación e sensibilización sobre os valores naturais deste espazo.

ADEGA anunciará proximamente novas actividades para continuar divulgando os valores ambientais das nacentes do Rato e dando a coñecer este espazo á sociedade lucense.