16-07-2025

A illa de compostaxe do CIFP de Compostela tratou en seis meses 5 toneladas de biorresiduos

O profesor de Enxeñería Química da UDC e vogal de residuos, Manolo Soto, achegouse á área de compostaxe comunitaria instalada no CIFP Compostela en outono de 2024, acompañado do concelleiro de Sustentabilidade Ambiental e Servizos Básicos, Xesús Domínguez, e do director do CIFP, Ramiro Esparís. Tamén estivo persoal técnico da empresa Sihaho. A asociación ecoloxista ADEGA, a través de supervisións e análises do compost producido e no marco do proxecto Compostela Composta, foi a encargada do proceso de formación e seguimento xeral desta área de compostaxe, que comezou a funcionar de forma continuada desde xaneiro de 2025.

Consta, en concreto, de seis módulos de compostaxe de 1m3, e ten unha capacidade de tratar 24 toneladas de biorresiduos procedentes da cociña e comedor do centro. O concelleiro de Sustentabilidade informou de que, transcorridos seis meses, a instalación xa tratou cinco toneladas. Coa finalización do curso en xuño de 2025 tense acadado compost maduro nos tres primeiros módulos, mentres os outros tres van continuar o proceso de maduración ata comezos de setembro, cando dea comezo o novo curso. Nese momento retomarase a actividade ordinaria do centro e o tratamento in situ dos residuos orgánicos xerados na súa actividade.

Formación na separación de residuos e compostaxe

Nesta primeira fase, ADEGA acometeu a posta en marcha e a formación das persoas usuarias: profesorado, alumnado e todo o persoal auxiliar do centro. O proceso comeza coa separación dos biorresiduos (restos orgánicos xerados na elaboración de comidas e sobras destas, incluíndo restos de carne e peixe), evitando que se mesturen con outros residuos non compostables, como plásticos, metais e residuos de envases en xeral. O persoal usuario do centro, neste caso, o alumnado que participa nos cursos de cociña e restauración, encargouse de toda esta parte do proceso e de entregar os biorresiduos nas unidade de compostaxe, onde os mesturou e cubriu co material estruturante (triturado de podas e arbustos achegado polo servizo municipal).

O resto do proceso foi levado a cabo polo mestre composteiro, que se encargou do mantemento semanal da unidade. Dúas veces por semana, nesta primeira fase, achegouse a realizar a mestura do material e, de ser necesario, corrixir a humidade mediante a rega e a cantidade de estruturante a engadir. Así mesmo, rexistrou todos os detalles da operación, en particular a temperatura do material en compostaxe.

Experiencia pioneira e útil para o sector da hostalaría

Tanto Xesús Domínguez como Manolo Soto destacaron como "moi positiva" a posta en marcha desta iniciativa. De feito, indicaron que os resultados conclúen a viabilidade do tratamento in situ dos residuos orgánicos xerados na actividade hostaleira, ao evitar ou reducir os custos de recollida, transporte e tratamento en planta e ao xerar un fertilizante de alta calidade para as terras agrícolas e actividades de xardinería. Neste sentido, a experiencia pódese extrapolar a outros centros e locais de restauración que dispoñan do espazo axeitado para acoller unha instalación deste tipo.

Novas relacionadas

• ADEGA e o Concello de Compostela impulsan un proxecto de compostaxe pioneiro no municipio