05-11-2024
A delegación da Coruña de ADEGA apoia a mobilización convocada pola Asociación Cultural e Veciñal Agra do Orzán, na Coruña, este xoves, 7 de novembro, ás 7:00 da tarde, baixo o lema "Parque da Agra XA!". Esta asociación veciñal leva máis de medio século en loita por un espazo verde para o uso e desfrute da cidadanía. Agra do Orzán é un dos barrios máis densamente poboados de Europa, onde viven preto de 30.000 persoas e onde, a día de hoxe, non hai ningunha zona verde que permita unha mellora da calidade de vida das persoas que o habitan.
ADEGA considera que esta reivindicación é máis que xusta. A ausencia de espazos naturais na Agra é o resultado dun desenfreo urbanístico e especulativo, que non tivo en conta as necesidades ambientais nin sociais á hora de planificar o crecemento da cidade. Este urbanismo desmedido, sen planificación a longo prazo e centrado na construción masiva de vivendas creou un entorno hostil para a vida cotiá, afastado das condicións necesarias para unha convivencia saudable e sustentable.
Naturalizar as nosas cidades non é só unha cuestión de estética, senón de saúde e benestar. A pandemia da Covid-19 puxo de relevo a importancia de contar con espazos abertos e verdes nas cidades, onde as persoas poidan respirar aire puro, realizar actividades ao aire libre e gozar dun espazo para o lecer. A creación deste parque sería un paso fundamental para mellorar a calidade de vida no barrio e para avanzar cara a unha cidade máis humana e sustentable.
ADEGA fai un chamamento a toda a cidadanía da Coruña a unirse a esta mobilización e apoiar unha demanda que busca non só mellorar o barrio da Agra, senón tamén avanzar cara a un modelo de cidade máis sostible e habitable. Para vivir mellor, temos que naturalizar as nosas cidades, e o barrio da Agra do Orzán precisa máis que nunca dun espazo verde que sexa o pulmón deste barrio.
ADEGA / Asociación para a defensa ecolóxica de Galiza
Avenida de Castelao, 20-Baixo 15704 Santiago de Compostela
Tlf/Fax: 981 570 099 Email: adega@adega.gal
