A Coruña, 27 de novembro de 2010. Neste día, ADEGA celebrou a súa 35 Asemblea Xeral na Coruña, cidade na que precisamente hai 35 anos naceu a nosa asociación. Arestora en Galiza estase a consolidar unha involución ambiental sen precedentes na historia do país. O obxectivo: o territorio no seu conxunto, unha prea para repartir; a excusa: a crise económica; o instrumento: as institucións públicas, ao servizo dos especuladores; e as consecuencias: unha perda moitas veces irreversíbel do noso patrimonio natural e cultural. Tras case dous anos de deconstrución sistemática por parte da actual Xunta dos tépedos avanzos ambientais da etapa anterior, a administración pretende agora aplicar a ortodoxia neoliberal con receitas xa coñecidas: urbanismo á carta, máis incineración, máis muíños a dedo, máis minicentrais, máis asfalto e coches... e espazos naturais menos protexidos, menos restricións urbanísticas, menos tren de proximidade, menos dereitos cidadás...

En definitiva, as novas-vellas políticas insustentábeis convintemente adubiadas con instrumentos baleiros de contido como as DOT e o POL, sustentadas en planificacións retrógradas como Plano de Residuos, o Plano Hidrolóxico, o Plano MOVE etc., e aferrolladas ben directamente con modificacións lexislativas á carta (Lei do Solo, Lei de Ordeamento Territorial, Lei Eólica...) ou ben co subterfuxio do “acompañamento”.

Neste marco hostil, ADEGA pretende afrontar a defensa deste inmenso patrimonio ameazado conscientes da nosa responsabilidade para co país e a cidadanía.

Portanto, e sen esquecer os tradicionais ámetos de actuación nos que ADEGA vén traballando, decidimos fixar como obxectivo prioritario das nosas accións e elemento transversal de referenza do noso traballo a defensa do territorio, como un dos sinais, senón o principal, da nosa identidade.

Non imos asistir impasíbeis a unha nova enaxenación dos nosos resursos naturais, exemplificada no recente reparto da “torta” eólica entre empresas amigas e tabeiróns da especulación enerxética, ou ao vergoñento troco de megawatios por incineradoras como pago de prebendas.

Tampouco imos permitir que leis fundamentais para a convivencia co noso medio, quer as que ordean o territorio, sexan traxes a medida dos intereses das construtoras e os seus factotums políticos, mentres o noso patrimonio natural esmorece agardando pola pala, o muíño ou a minicentral.

O ecoloxismo e a sociedade debemos facer fronte a este desafío con valentía, intelixencia e sentido da responsabilidade. Reclamamos un futuro digno para o noso territorio e os que hanitamos nel, o recurso non renovábel máis valioso, centrado na conservación e uso sustentábel dos seus valores fronte á depredación, a mercantilización ambiental e o lucro desmedido.

Nesta tarefa, ADEGA compremeterá os todos os seus esforzos, facendo un chamado á cidadanía galega para que resposte tamén a este transcendental desafío.

RESOLUCIÓNS DA 35 ASEMBLEA DE ADEGA