ADEGA

Inicio / Novas / Delegacións / O TSXG ratifica 12 anos despois a ilegalidade...

18-04-2018

O TSXG ratifica 12 anos despois a ilegalidade dunha urbanización de 69 adosados na Frouxeira

No momento álxido da burbulla inmobiliaria valía todo. Ou case.
Daquela, en marzo de 2005, o concello de Valdoviño aprobaba o proxecto de urbanización "Unidade de Actuación nº 2 de A Saiña". Rapidamente "Construcciones Rías Gallegas SA", solicitaba licenza para a edificación das primeiras 17 vivendas (de 69), chalés unifamiliares e adosados. O problema era que a urbanización ocupaba solo rústico de especial protección de espazos naturais (RN 2000 -LIC e ZEPA- e zona Ramsar), solo rústico de especial protección de costas por incluir terrenos a menos de 100 m do dominio público, e tamén solo rústico de especial protección do patrimonio, por atoparse dentro da afección do Castro da Frouxeira.
En 2006 ADEGA presenta a correspondente denuncia perante o concello de Valdoviño, a Dirección Xeral de Urbanismo, a Dirección Xeral de Conservación da Natureza e o SEPRONA. Como resultado conseguimos, apesar da oposición da daquela corporación municipal, unha primeira paralización das obras que o promotor tentou reiteradamente ignorar, reiniciándoas en varias ocasións.
A Axencia de Protección da Legalidade Urbanística confirmou as nosas denuncias, e consecuentemente o concello de Valdoviño tivo en 2009 que declarar nula a licenza. A construtora recorreu en instancia contencioso-administrativa que un xulgado de Ferrol desestimou en 2012, acto que "Construcciones Rías Gallegas SA" recorríu perante o TSXG.

Finalmente en decembro de 2017 o TSXG desestima o recurso da construtora e valida as denuncias de ADEGA e a conseguinte suspensión das licenzas acordadas en 2009 polo concello de Valdoviño. Literalmente, o fallo ditamina que a anulación das licenzas ditouse para "tutelar os valores ecolóxicos, naturais, paisaxísticos e do medio ambiente".

Un longa singradura xurídico-administrativa con episodios rocambolescos

No camiño quedan sorprendentes informes (casualmente a favor da construtora), emitidos por diversas administracións e destapados pola Fiscalía Ambiental tralas denuncias de ADEGA: como que a planimetría da obra localizaba o castro no mar!? o que fixo que a D. X. de Patrimonio emitira un informe favorábel... Calquera con acceso a internet podería ter comprobado a posición "errónea" do xacemento, mais a Xunta deuna por boa. E naquela altura, Costas e Medio Ambiente tamén informaron favorabelmente a obra, malia a afectar á servidume do DPMT e a un LIC con hábitats prioritarios...

Outra volta, tivo que ser ADEGA quen investíu tempo e recursos en defender a legalidade fronte ao desleixo cómplice das administracións. Teremos que ser sempre veciños/as e ecoloxistas os que miremos polo noso patrimonio?

Novas relacionadas

ADEGA / Asociación para a defensa ecolóxica de Galiza
Avenida de Castelao, 20-Baixo 15704 Santiago de Compostela
Tlf/Fax: 981 570 099 Email: adega@adega.gal