Artigos de Contaminación. Revista CERNA, medio ambiente e ecoloxismo da man de ADEGA
O gas radón nas vivendas galegas.
Xoán Miguel Barros Dios
CERNA Nº 62 - O lixo en Galiza: Máis incineración?
Páx. 32 - 35
O radón é un gas radioactivo de orixe natural que emana do radio que á súa vez provén do uranio presente nas rochas graníticas e que, segundo a Organización Mundial da Saúde, é responsábel de entre o 3% e o 14% das mortes por cancro de pulmón. É por isto, polo que se quere dispor no Estado español dun mapa de radón que sinale, fundamentalmente, as zonas xeográficas cun alto nivel de radiación. En Galiza as medicións lévanse a cabo pola Universidade de Santiago de Compostela, baixo a coordinación do director do Laboratorio de Radón de Galiza, Xóan Miguel Barros Dios. O profesor desvela a través deste artigo algunha das particularidades deste gas tan frecuente en Galiza, como descoñecido.
Lodos vermellos. Galiza mira a Hungría
Ramón Varela Díaz
CERNA Nº 63 - Galiza: Territorio agredido
Páx. 12 - 14
En outubro de 2010 produciuse un vertido de 800.000 toneladas de lodos vermellos, que escaparon dunha balsa e causaron numerosos danos persoais, a morte de nove persoas e máis de 200 feridos, e a destrución de hábitats próximos. A mala xestión que fixo a empresa de aluminios instalada en Hungría é a mesma que fai alumina aluminio na súa fábrica de Alcoa situada no norte da provincia de Lugo. Así, ponse de manifesto o perigo que supón para os galegos as súas instalacións e o sinxelo que sería evitalo se a propia empresa tivera un interese real polo ambiente, máis se a lexislación non lles obriga o máis probable é que este desastre volva ser noticia en calquera punto de Europa proximamente.
Contaminación acústica. Solucións para mellorar o noso contorno
Gabriel Pereiro
CERNA Nº 64 - O impacto do cambio climático nas rías galegas
Páx. 20 - 23
No noso contorno existe unha problemática importante e moitas veces descoñecida como é a contaminación acústica. Sinxelas consideracións permitirían dar solución, en maior ou menor medida, a este problema. De feito, segundo a Organización Mundial da Saúde(OMS), actualmente España é o segundo país do mundo que máis ruído presenta; só superado por Xapón. No presente artigo amósanse distintas solucións de uso cotián para reducir este tipo de contaminación con exemplos gráficos de medidas adoptadas na nosa Comunidade. Faise, ademais, un breve repaso a dous aspectos fundamentais para dar solución a este problema: o tipo de materiais que se deben empregar e onde se deben situar. Asemade, preséntase unha nova alternativa nacida en Galiza no marco da normativa vixente e do tan ansiado desenvolvemento sostíbel consistente no aproveitamento dun dos nosos recursos naturais renovábeis (a biomasa) para controlar os ruídos.
A explotación da pizarra en Galiza e os seus impactos ambientais
Dr. Francisco Gutiérrez
CERNA Nº 65 - Os ríos: explorar para conservar
Páx. 36-37
Galiza é a primeira potencia mundial en producción e exportación de lousa. A explotación deste recurso leva asociada unha problemática ambiental moi específica e característica. O desproporcionado desenvolvemento do sector, a falta de criterios racionais no deseño e planificación das explotacións, unido á inexistencia de previsión ou planificación ambiental provocou que herdaramos unha complexa e problemática situación, non só ambiental e mineira, senón tamén social e económica. O estudo da explotación da lousa en Galiza dá como resultado que a situación ambiental destes coutos mineiros é irreversíbel, que non é posíbel a súa restaauración e que é inviábel economicamente a súa recuperación ou rehabilitación. É preciso, pois, un cambio de modelo na explotación das louseiras en Galiza, que se especifica neste artigo.
A Cementeira Cosmos, incineración tamén no Bierzo (Crónica dunha loita gañada)
Luís Fernández Canedo
CERNA Nº 65 - Os ríos: explorar para conservar
Páx. 38
En xaneiro de 2007 faise pública a Autorización Ambiental a Cementos Cosmos, para utilizar como combustíbel alternativo nos fornos da fábrica de Toral de los Vados, os seguintes refugallos: pneumáticos, fariñas e graxas animais, lodos de depuradora, plástico e biomasa. Ecoloxista en acción da provincia de León presentou alegacións ao proxecto ante o Servizo Territorial de Medio Ambiente da Xunta de Castela e León, e en abril dese mesmo ano organizou unha charla no salón de actos de Caixa España para informar dos perigos que o proxecto crearía para a saúde, o medio ambiente e a economía da comarca, e ponse en marcha a recollida de sinaturas contra o proxecto.
Grandes industrias contaminantes da atmósfera en Galiza
Ramón Varela Días
CERNA Nº 66 - Espazos protexidos, baixo mínimos
Páx. 36-37
A finais de Novembro de 2011, o “Rexistro Estatal de Emisións e Fontes Contaminantes” (PRTR – España) fixo públicos os datos correspondentes ao ano 2010. A situación no noso país segue sendo mala e non mellorou co paso do tempo. NO PRTR – España rexistráronse en Galiza 26 actividades contaminantes das que 22 contaminan a atmósfera, 10 contaminan a atmósfera e a agua e 4 contaminan so a auga.
.gif)
Avenida de Castelao, 20-Baixo 15704 Santiago de Compostela
Tlf/Fax: 981 570 099 Email:cerna@adega.gal
Edición: Ronda Fontiñas, 180 Entrechán. 27002 Lugo
Tlf: 982 240 299 Email: cerna@adega.gal