Buscador
A paisaxe galega do interior transfórmase na do Douro portugués
Francisco Díaz-Fierros Viqueira
Páx. 29-31
A problemática do Cambio Climático non é nova. O primeiro que a tratou desde unha perspectiva científica foi Arrhenius que en 1896 formulou: “Se o contido do carbono na atmosfera se duplica, a temperatura do clima aumentará en 4°C”. Este dato é case unha rúbrica do último informe do Panel Internacional para o Cambio Climático (IPCC). Foi nos anos 1960-70 cando o problema do cambio climático comezou a transcender entre a comunidade científica. Nos anos 80 os termómetros rexistraron unha grande curva ascendente das temperaturas e, con este fenómeno, confluíron outros factores que fixeron mudar a opinión dos científicos, dos medios de comunicación e da opinión pública en xeral.
Entrevista a Francisco Díaz –Fierros: “Os problemas de comunicación máis graves están na ciencia”
Por Belén Rodríguez
Páx. 32
Francisco Diaz-Fierros Viqueira é catedrático de Edafoloxía e Química Agrícola na Universidade de Santiago de Compostela. Profundo coñecedor da Galiza rural, da súa cultura e do medio natural galego, é presidente do Seminario de Estudos Galegos e vicepresidente desde 2002 do Consello da Cultura Galega. É tamén coñecedor do nacemento do movemento ecoloxista galego (foi presidente da Sociedade Galega de Historia Natural e é colaborador de Cerna e ADEGA-Cadernos). Actualmente participa en diversas investigacións sobre o Cambio climático. É autor de A Cuestión ambiental en Galicia: raíces dunha nova cultura (Galaxia, Vigo 2006). O pasado xuño de 2007 conversamos con el para Cerna.
Incendios forestais e Banco de Terras
Alfredo Suárez Canal
Páx. 34-38
Os efectos do cambio climático abondan para xustificar cambios estruturais no eido forestal. Este artigo versará sobre dúas iniciativas lexislativas promovidas polo goberno bipartito no eido rural que se constituíron no primeiro chanzo doutros cambios futuros. Un deles, a Lei de incendios, coa súa valorización e coa súa relación cos asentamentos rurais. O outro, a Lei do Banco de Terras, ten que ver con poñer en valor todo o potencial agrario e gandeiro no noso país.
Cara unha xestión forestal sustentábel
Fins Eirexas
Páx. 39-40
De todos os recursos madeirábeis presentes no monte que son aproveitados comercialmente, preto do 85% corresponden ao piñeiro e ao eucalipto. Isto dá unha idea do enorme sesgo produtivo que existe nos nosos montes a favor das especies pirófitas de baixo valor engadido. Outro factor de distorsión que contribúe a afastar a xestión dos montes galegos da sustentabilidade é a estrutura de propiedade da terra: o 68% pertence a propietarios privados, o 30% son montes veciñais e tan só o 2% son de titularidade pública. ADEGA entende que para reverter a situación de altísima sinistralidade dos montes galegos é preciso atacar estas causas estruturais que favorecen a aparición dos lumes, paralelamente a unha nova ordenación do territorio que fixe a poboación no medio rural, e a promoción de modos de aproveitamento alternativos ao monocultivo de pirófitas.
Voluntariado en defensa dos nosos montes
Xosé Ares
Páx. 42
Os montes galegos sufriron en 2006 unha agresión ambiental tan grave que tardará moitos anos en recuperarse. O voluntariado en defensa do monte galego nace como resposta pero, tamén, para anticiparse a todas e cada unha destas problemáticas. Leváronse a cabo labores de intendencia e apoio contra o lume, preparáronse as tarefas de reforestación e recuperación ambiental e posuíronse dispositivos de vixilancia. O voluntariado en defensa dos nosos montes estivo coordinado por ADEGA e apoiado pola Dirección Xeral de Xuventude e Solidariedade de vicepresidencia da Xunta.
Proxecto Polo Monte. Educar sobre o terreo
Carmela García González
Páx. 44-45
O obxectivo deste proxecto é traballar na escola sobre o territorio, para analizar os incendios forestais e o impacto humano no medio natural. Este proxecto pretende crear unha Rede de Grupos de Traballo que conforme un Observatorio do Territorio, no que se traballa a comunidade escolar, que se forma, informa, e relaciona a través de internet. Ademais a experiencia permite integrar a colaboración de grupos ecoloxistas e sociais. Trala convocatoria de xaneiro de 2007, participaron 40 centros e preto de 100 profesores e grupos de traballo en POLO MONTE.
.gif)
Avenida de Castelao, 20-Baixo 15704 Santiago de Compostela
Tlf/Fax: 981 570 099 Email:cerna@adega.gal
Edición: Ronda Fontiñas, 180 Entrechán. 27002 Lugo
Tlf: 982 240 299 Email: cerna@adega.gal