21-03-2016

No Día Internacional dos Bosques, concellos e cidadanía aximos a prol dos nosos bosques e contra o eucalipto

Con motivo do Día Internacional dos Bosques ou Día da Árbore (21 de marzo) as organizacións ecoloxistas reclamamos políticas activas para conservar os nosos bosques. Alén disto, e perante a imparábel expansión do eucalipto, cidadanía e concellos podemos e debemos reaxir.

A conservación dos nosos bosques e o combate ao eucalipto foi o eixo central de traballo que a 40 Asemblea de ADEGA fixou para este ano 2016.
Deste xeito e no marco das campañas “COUSA DE RAÍCES” en defensa dos nosos bosques autóctonos e "STOP EUCALIPTO... AVANTE CARBALLO!", promovidas  xunto a unha manchea de organizacións sociais e gremiais, queremos neste día dar publicidade ás ferramentas que a cidadanía dispón para poder reaxir fronte á imparábel extensión do eucalipto e darlle unha oportunidade aos nosos bosques.

Non fiques parado/a fronte a unha plantación de eucaliptos: como saber se é legal?

Malia a que a Lei de Montes 9/2012 é unha desas normas aprobadas en solitario polo PP e favorecedoras das grandes superficies con monocultivos forestais, nomeadamente dos eucaliptos, existen unha serie de limitacións referidas ás características dos terreos e ás distancias que deben cumprir as plantacións forestais. Estes límites afectan por exemplo a plantacións de eucaliptos en parcelas con masas de frondosas autóctonas, en terreos agrícolas, a menos de 15m dos cursos fluvias ou a menos de 100m da liña de costa, entre outros.

En ADEGA temos elaborado un "kit" de resposta rápida fronte a plantacións ilegais que permite verificar in situ se cumpren ou non coa normativa, e ademais inclúe un modelo de denuncia. Á marxe das actuacións que calquera particular ou entidade queira desenvolver usando este “kit”, en ADEGA seguiremos recollendo, trasladando á administración e denunciando aquelas cortas ou plantacións ilegais que ameazan a supervivencia das nosas frondosas autóctonas

Concellos e deputacións poden e deben promover a conservación dos nosos bosques autóctonos

Polo que atinxe aos concellos, entanto que administración máis próxima á cidadanía, estes poden através dos PXOM e demais normativa municipal, contribuir á conservación dos nosos bosques e tentar limitar a proliferación do eucalipto.

• A este respeito, e alén de vixiar polo cumprimento das condicións e requisitos legais de cortas e plantacións, é fundamental que na planificación do solo rústico, o concello conte cunha axeitada delimitación e un inventario das masas de frondosas no seu territorio.

• Malia a non contaren coas competencias para a autorización de talas, os concellos poden establecer taxas, fianzas e condicións ás empresas madeireiras polo uso dos camiños e espazos públicos nos labores forestais.

• Asemade, aquelas entidades locais que conten con montes patrimoniais poden servir de exemplo promovendo nestes territorios a plantación de frondosas e os modelos de aproveitamento multifuncional, como alternativa á eucaliptización.

• Tamén sería interesante promover por parte dos concellos, mediante o asesoramento e a formación dos propietarios e comunidades de montes, as boas prácticas e a transparencia na xestión dos montes.

Por último, dende as deputacións pódese non só reforzar as medidas antes expostas, senón tamén pór en marcha liñas de axuda para o fomento de modelos silvícolas sustentábeis e de alto valor engadido (como os castiñeiros), sen esquecer a promoción de modelos máis participativos e respectuosos de relación coa terra, como a custodia do territorio.

Ligazóns

• Propostas para celebrar o Día da Árbore

Novas relacionadas

• STOP EUCALIPTO... AVANTE CARBALLO! É o momento de pararlle os pés ao eucalipto
• "Kit de emerxencia" fronte a plantacións ilegais de eucaliptos
• ADEGA esixe á Xunta que protexa e poña en valor o bosque autóctono ante o incremento das plantacións de eucalipto
• COUSA DE RAÍCES reivindica o bosque galego como protector do solo