Inicio /
Novas /
Todas /
ADEGA apoia o manifesto en defensa dos mercados...
27-03-2020
ADEGA apoia o manifesto en defensa dos mercados de proximidade durante a corentena
Máis de corenta organizacións galegas de diversos ámbitos, entre as que se atopa ADEGA, veñen de facer público un manifesto no que piden a reapertura dos mercados alimentarios de proximidade como garantes da seguridade alimentaria de Galiza no contexto actual de estado de alarma e emerxencia sanitaria pola pandemia do Covid-19.
O pasado 20 de marzo, os sindicatos SLG e FRUGA publicaban un comunicado no que alertaban á sociedade galega de que o goberno central estaba a prohibir a celebración dos mercados de alimentos locais de venda directa por cuestións, presumiblemente , de seguridade durante o período de confinamento. A través da Orde do 23 de marzo, a Xunta, retractándose da súa posición orixinal, tamén prohibiu a celebración destes mercados de cercanía ata o 31 de marzo. Ante esta situación, ADEGA considera necesario apoiar, xunto con outras máis de 40 entidades de distintos ámbitos, o seguinte manifesto que reproducimos de maneira íntegra.
MANIFESTO
EN DEFENSA DOS MERCADOS DE ALIMENTOS DE PROXIMIDADECOMO GARANTES DA SEGURIDADE ALIMENTARIA NO ESTADO DE ALARMA
Nós, os labregos e labregas que damos vida aos mercados de proximidade na Galiza, diante da prohibición de poder exercer a nosa función como fornecedores de alimentos para a sociedade por mor das restricións impostas para enfrontar a pandemia do Covid-19, queremos manifestar:
- A nosa consternación ao ver como se nos discrimina, unha vez máis, en favor das grandes superficies comerciais, á hora de garantir o acceso en tempo de crise a un ben esencial como a alimentación.
- A nosa perplexidade, cando constatamos a diferenza de criterios entre administracións, con comunidades autónomas que autorizan expresamente os mercados de proximidade e outras, como a galega, que os prohiben; con concellos que regulan esta venda directa en tempo de crise e outros que a clausuran sen máis.
- O noso convencemento de que os nosos alimentos e os nosos mercados, aplicando as normas establecidas polas autoridades sanitarias para evitar a transmisión do Covid-19 e o agravamento da pandemia, son máis seguros nas actuais circunstancias por celebrarse ao aire libre ou en espazos amplos como prazas de abastos, por non haber intermediarios entre a produción e o consumo final, por non xerar aglomeracións humanas, e por termos, porque así nolo esixe a normativa, unha mellor e máis completa formación en cuestións hixiénico-sanitarias que a maioría do persoal que traballa en grandes superficies comerciais. Ademais os mercados alimentarios de proximidade teñen unha maior capacidade de garantir o subministro de alimentos frescos ao non depender de estruturas centralizadas e vulnerables. Pensamos que obstaculizar a produción alimentaria local e a súa comercialización nunha crise como a que estamos a vivir é un crime e un suicidio.
- A nosa indefensión porque, sendo sector primario, se nos priva de exercer a nosa principal actividade económica sen ningún tipo de compensación ou alternativa que mitigue o grave deterioro financeiro que sufriremos nas vindeiras semanas. Nese sentido, botamos de menos medidas que se poderían impulsar dende as administracións, como a compra pública de alimentos para que os servizos sociais os inclúan na distribución de cestas de alimentos ás familias que os precisen, ou mesmo incorporar os nosos medios e experiencia no reparto domiciliario de cestas de produtos.
- A nosa impotencia porque a maior parte dos alimentos que producimos son frescos e sans e, polo tanto, neles non empregamos conservantes químicos ou refrixeración para atrasar o seu deterioro, como si fará a agricultura industrial para poder vendelos cando se levanten as restricións.
Por todo iso, pedímoslle á Consellaría de Medio Rural, en colaboración cos concellos, que faga todos os esforzos necesarios para que, a partir do 31 de marzo, volva autorizar os mercados de alimentos de proximidade, preocupándose de que dispoñan dos medios materiais e humanos necesarios para organizar e aplicar correctamente todos os protocolos de seguridade a que obriga a orde do 23 de marzo de 2020 sobre a venda directa de produtos agrogandeiros nos mercados.
Apoian este manifesto
- A Eira do Colexio de Educadores e Educadores Sociais de Galicia (CEESG)
- Amarelante SCG
- Amig@s da Terra
- Asociación de Produtoras de Horta de Ribadeo A Sucadoira
- Asociación Galega de Apicultura (AGA)
- Asociación Mercado da Terra (Lugo)
- Asociación Millo Miúdo (Oleiros)
- Asociación O Xaramelo (Meis)
- Asociación para a Defensa Ecolóxica de Galiza (ADEGA)
- Asociación Raíces do Lusco
- Asociación 4ponlas (Pontevedra)
- CDR Portas Abertas
- Centro Social A Gentalha do Pichel (Compostela
- Centro Social Madia Leva (Lugo)
- Centro Social O Fuscalho
- Centro social O Quilombo (Pontevedra)
- Confederación Intersindical Galega (CIG)
- Enxeñería sen Fronteiras
- Espazo Agroecolóxico A Estruga (Cabreiros, Xermade)
- Federación Rural Galega (Fruga)
- Greenpeace
- Grupo de Consumo Agrelar (Allariz)
- Grupo de Consumo Semente (Ourense)
- Grupo de Consumo Xurumelxs (Ourense)
- Grupo de Bioeconomía da USC
- Grupo de investigación en agronomía AGRONOMÍA (USC)
- Grupo de Investigación en Construción Sustentable para o Medio Rural e Natural COSMERUN (USC)
- Grupo de Investigación en Economía Agroalimentaria e Medioambiental, Desenvolvemento Rural e Economía Social ECOAGRASOC (USC)
- Grupo de Investigación Galabra en Estudos Culturais GALABRA (USC)
- Grupo de Estudios de Historia Empresarial e Sectorial. Pesca, Industria e Comercio GESPIC (USC)
- Grupo de Historia Agraria e Política do Mundo Rural. Séculos XIX e XX HISTAGRA (USC
- Grupo de Investigación da Agricultura Ecolóxica, Agroecoloxía e Historia da Universidade de Vigo
- Grupo de Investigación en Pedagoxía Social e Educación Ambiental SEPA-Interea
- Laboratorio do Territorio LABORATE (USC)
- Lareira do Alén, Clube Gastronómico
- Marcha Mundial das Mulleres Galiza
- Movemento Ecoloxista da Limia (MEL)
- Nais polo Clima
- Non é o mesmo (Compostela)
- Nós Galeguistas
- Proxecto Resclima
- Rede de Consumo O Careón (Melide)
- Rede para o Decrecemento Eo-Navia Galiza o Bierzo
- Rede Revolta de Agroecoloxía e Historia
- Sindicato Labrego Galego (SLG)
- SPG A Gavela
Ligazóns
Descargas
