14-07-2015

Crónica do III Congreso Internacional de Educación Ambiental

Déronse cita máis de 500 persoas de toda a lusofonía para compartir experiencias, proxectos, metodoloxías e investigacións sobre a educación ambiental. O congreso contou con múltiples visións sobre a educación ambiental e fomentou un amplo debate promovido pola Rede Lusófona sobre o tema: “Educação Ambiental e Participação Social: travessias e encontros para os bens comuns”

ADEGA, a través dos diferentes proxectos que desenvolve, participou activamente no III Congreso presentando iniciativas de educación ambiental dende a acción social e o ecoloxismo. Proxecto Ríos, Charcas con Vida, Proxecto Cerna, Compostaxe e a Eira da Xoana foron as iniciativas que dende ADEGA se levaron ao III Congreso, cunha elevada participación e asistencia por parte dos/as participantes, e en varios formatos como comunicacións orais, exposicións,  pósteres, eventos paralelos e mesas redondas. ADEGA implicouse tamén na coordinación do Congreso, dinamizando diferentes espazos e actividades, como saídas de campo, eventos paralelos e  obradoiros, así como aportacións ás conclusións do congreso. Ademais, levouse material divulgativo de ADEGA que estivo exposto na sede do congreso e serviu para amosar aos participantes o traballo de defensa da natureza que levamos facendo durante catro décadas. As conclusións, memorandos, cartas e manifestos do III Congreso Internacional de Educación Ambiental dos Países e Comunidades de Lingua Portuguesa estarán dispoñibles na web do congreso (http://www.ealusofono.org/) a partir do 25 de xullo de 2015.
Pódese ler tamén o artigo Lusofonía e Ambiente feito por Adela Figueroa.

Ligazóns

• Participación de ADEGA no Congreso (nova relacionada)
• Album imaxes 1
• Album imaxes 2

Descargas

• Lusofonía e Ambiente