12-01-2015

Novo proxecto de ADEGA sobre as Especies Exóticas Invasoras

ADEGA ven de ser seleccionada pola Fundación Biodiversidad para desenvolver o proxecto “Rede de voluntariado ambiental para a eliminación de especies invasoras en ecosistemas acuáticos”, que conta co apoio do Ministerio de Agricultura, Alimentación e Medio Ambiente, a través da Fundación Biodiversidad.

A iniciativa a desenvolver neste novo ano estará centrada pois  na divulgación das especies exóticas invasoras que ameazan os nosos ríos, charcas e humidais. Un dos grandes problemas ambientais dos nosos tempos, e a segunda causa de perda da biodiversidade do planeta.

O proxecto ten dúas liñas principais. A primeira centrada na divulgación desta problemática ambiental, coa edición de material divulgativo específico sobre estas especies que será distribuído de xeito gratuíto. Dentro desta liña tamén está previsto o asesoramento para identificación de especies exóticas invasoras nos ríos e charcas de Galiza, durante as inspeccións destes ecosistemas en iniciativas como Proxecto Ríos ou Charcas con Vida. Ademais se celebrará unha xornada formativa sobre esta temática.

A segunda liña será a de voluntariado ambiental e custodia do territorio para eliminación de especies exóticas invasoras. Un eido no que ADEGA leva a traballar moitos anos, con centos de persoas voluntarias e en numerosos espazos de toda Galiza. Dentro desta iniciativa están previstas 3 xornadas de voluntariado, onde as persoas participantes poderán coñecer lugares de especial valor ecolóxico, axudando de xeito participativo na súa recuperación e conservación.

Ao remate deste proxecto ADEGA editará un protocolo de actuación para eliminación de especies exóticas invasoras con voluntariado.

ADEGA publicará as actividades deste proxecto na web www.adega.gal, así mesmo calquera persoa interesada en recibir información adicional pode solicitala no correo lucia@adega.gal ou ramses@adega.gal

Ligazóns

• web Fundación Biodiversidad