ADEGA

Inicio / Novas / Delegacións / ADEGA guiará 3 roteiros organizados pola...

03-10-2014

ADEGA guiará 3 roteiros organizados pola Deputación de Lugo

Visitaranse bosques singulares da provincia

Os nosos bosques

Programa de roteiros

ADEGA-Lugo será a encargada de dirixir os roteiros que organiza a Área de Medio Ambiente da Deputación de Lugo neste último trimestre de ano, dentro dun amplo programa de actividades que vén de presentar hoxe ante os medios de comunicación. Estes roteiros estarán financiados polo organismo provincial, polo que serán de balde para os participantes, os cales só deberán levar comida para o camiño e roupa e calzado axeitados.

A través destas camiñadas coñeceremos 3 dos bosques máis emblemáticos da provincia luguesa. O programa de roteiros "Os nosos bosques" permitiranos, non só pasar agradables xornadas de andaina e de contemplación, senón tamén observar o valor que as nosas árbores ofrecen á paisaxe, ao patrimonio cultural e á natureza.

  • O primeiro destino non podía ser outro que a Serra do Courel, en concreto, a Devesa da Rogueira, que rematará co tradicional magosto en Ferreirós de Abaixo. Será o domingo 26 de outubro.
  • O 16 de novembro acudiremos ao Aciñeiral de Cruzul, de Becerreá, para dar a coñecer unha das formacións arbóreas de aciñeiras escasas na nosa xeografía, e que ademais se atopa dentro dun Lugar de Interese Comunitario, á entrada dos Ancares galegos.
  • A Fraga da Marronda de Baleira é a nosa escolla para o mes de decembro. O día 14 dese mes achegarémonos ata esta fraga de val para observar a súa modesta grandeza en corpo presente.

Hora e lugar de saída

Os roteiros serán de xornada completa, e o autobús sairá en todos os casos diante da Facultade de Formación do Profesorado de Lugo (antigo Maxisterio), ás 9 horas da mañá.

Os participantes terán que levar comida e auga para o camiño e roupa e calzado axeitados para camiñar.

Só poderán participar nestes roteiros aquelas persoas que tivesen cumprimentado adecuadamente o formulario da Deputación de Lugo ou que se tivesen anotado a través do teléfono a tal efecto (982227812), por iso recomendamos que fagades a vosa reserva canto antes.

Ligazóns

Descargas

ADEGA / Asociación para a defensa ecolóxica de Galiza
Avenida de Castelao, 20-Baixo 15704 Santiago de Compostela
Tlf/Fax: 981 570 099 Email: adega@adega.gal