Inicio / Novas / ADEGA Nacional / ADEGA imparte o Ciclo de Charlas medioambientais...
03-07-2023
A asociación ecoloxista ADEGA, coA colaboración do concello de Moaña, impartirá a partir do vindeiro venres, 7 de xullo, varias charlas de carácter medioambiental, dirixidas a toda a veciñanza do municipio e, por extensión, a toda a comarca do Morrazo. O ciclo de palestras “Ti podes paralos!” forma parte da campaña reivindicativa de ADEGA que leva o mesmo nome e que ten como obxectivo frear nos tribunais a actual invasión eólica a través da solidariedade colectiva e do pobo galego.
Baixo o lema “Ti podes paralos!” estas palestras pretenden empoderar á veciñanza e aos colectivos locais na defensa do seu territorio e da súa contorna natural fronte as ameazas do capitalismo máis agresivo e depredador. O ciclo de charlas medioambientais “Ti podes paralos!” poñerá ao dispór da veciñanza de Moaña información sobre os efectos negativos que o desenvolvemento de certas actividades poden exercer sobre a súa contorna natural e con que ferramentas legais ou de protección ambiental conta a cidadanía para defenderse de tales afrontas, cada vez máis próximas á veciñanza.
O ciclo de palestras “Ti podes paralos!” será inaugurado o vindeiro venres día 7 de xullo, ás 20 horas, polo secretario técnico de ADEGA, Fins Eirexas, que falará das diferentes ferramentas de protección ambiental á que poden recorrer os concellos, e mesmo ás comunidades veciñais de montes en man común, e polo especialista en árbores senlleiras, Gaspar Bernárdez.
O mércores 12 de xullo, ás 20 horas, Tonio Nogueira, voceiro da Plataforma “Eólicos no Morrazo, NON” dará conta dos efectos que implica para o noso territorio o desenvolvemento do actual modelo enerxético e a súa ineficacia fronte a emerxencia ambiental global na que a nosa sociedade vive. Pola súa banda, Eva Bernárdez, secretaria de Comunidade de montes veciñais en man común de Moñaa, explicará a súa experiencia no eido da restauración ambienta, a través da recuperación do bosque galego fronte ao monocultivo de especies invasoras.
O ciclo de charlas medioambientais de Moaña rematará o sábado, 15 de xullo, cunha palestra de Zeltia López, da Asociación Morcegos de Galicia, quen a partir das 12 horas, compartirá coas persoas asistentes o seu coñecemento sobre os impactos que as poligonais macro-eólicas poden exercer sobre a fauna salvaxe, e nomeadamente, sobre os morcegos.
Este ciclo de palestras convidará ás persoas asistentes a contribuír solidariamente coa campaña de ADEGA fronte a depredación enerxética “Ti podes paralos!” a través da cal se pretenden recorrer xudicialmente uns 30 proxectos macroeólicos e especulativos, autorizados recentemente pola Xunta en todo o territorio galego.
ADEGA agradece encarecidamente á veciñanza de Moaña e ao seu concello a súa colaboración solidaria nesta campaña, malia a non ser un dos municipios galegos directamente ameazados actualmente pola invasión eólica.
#TiPodesParalos #TPP #EólicaAsíNon
ADEGA / Asociación para a defensa ecolóxica de Galiza
Avenida de Castelao, 20-Baixo 15704 Santiago de Compostela
Tlf/Fax: 981 570 099 Email: adega@adega.gal
