Os vindeiros días sábado 2 e domingo 3 de outubro celébrase en Arzúa unha nova edición da Feira TERRACTIVA, o festival das artes pola biodiversidade. Xa é tradiciomnal que ADEGA participe neste evento cun stand con información sobre as actividades de ADEGA e diverso material divulgativo. Este ano ademáis organizamos en colaboración cos Toiteiros do Furelos un limpa-roteiro fluvial; apresentamos a exposición "O lobo, unha carreira pola supervivencia"; e participamos en palestras sobre o proxecto de ADEGA "A Eira da Xoana" e "O urbanismo en Galiza: o caso de Barreiros," entre outras.

27 de setembro de 2010. Un verán máis o subministro de auga de Caldas vese alterado pola mala calidade das augas do Umia. As causas están no encoro de Caldas, que outra volta tense convertido, debido á proliferación explosiva de cianobacterias, nunha sopa verde, cheirenta e tóxica imposíbel de depurar nin coas máis esixentes técnicas. Dacordo cos estudos da USC e da propia OMS, un exceso de Microcystis na auga é extremadamente perigoso para a saúde porque estas malia a seren destruidas, liberan unha cianotoxina -a microcistina- de efectos acumulativos, que ataca ao fígado, pode provocar problemas intestinais e neurolóxicos e mesmo funcionar como indutora ou desencadeante de tumores. Por iso, agora máis ca nunca ADEGA volta a pedir a demolición do encoro, única medida efectiva para garantir a saúde da poboación e a do río.

13 de setembro de 2010. A política de dumping dalgunhas empresas leiteiras está a convertir o agro galego nun ermo. Esta estratexia vese favorecida pola falla de compromiso institucional para defender o noso sector agrogandeiro. Tras promover durante anos a intensivización, facilitar a concentración do mercado nunhas poucas mans, e ignorar as demandas dun grupo lácteo galego, a administración segue dando as costas ao agro, refén das transnacionais. En ADEGA coidamos que sen un mundo rural vivo, os desequilibrios ambientais agrávanse: despoboamento e abandono, cambio de usos e especulación, lumes... Resulta indecente que a Xunta siga a subvencionar a merca de coches, malia á constante caída das vendas, e a achantar o camiño á especulación urbanística e industrial, en troques de apoiar aos sectores produtivos baseados na terra que contribúen a manter vivo o mundo rural.