2 de abril de 2012. A reacción cidadá perante a catástrofe ecolóxica do Eume non se fai esperar: este luns 2 ás 20h constituirase en Pontedeume a Plataforma pola Defensa das Fragas do Eume da que ADEGA fará parte. Trataremos de sensibilizar á opinón pública do valor ecolóxico que aínda conservan as Fragas; demandaremos da Xunta medidas para remediar no posible os impactos do lume no ecosistema do Parque e esixiremos unha investigación exaustiva das causas do incendio e as responsabilidades penais e políticas que procedan. ADEGA chama tamén a participar nas diversas concentracións de protesta por esta catástrofe que se están a preparar nas principais vilas e cidades galegas. É unha traxedia para o País, que a cidadanía non pode esquecer nen perdoar!

Independentemente das causas do lume nas Fragas, claramente intencionado, ADEGA cre preciso promover unha reflexión que trascenda a coxuntura particular deste incendio. Cómpre analisar as causas de fondo, tanto das políticas de loita contra o lume e de xestión dos nosos montes como das de conservación, e non esquecermos esixir responsabilidades aos que as deseñaron e executaron.

E a respeito das políticas de conservación, cómpre tamén reflexionar sobre a actual situación dos nosos espazos protexidos, abandoados á súa sorte, sen investimentos nen iniciativas (PORN, PRUX) que garantan a conservación do patrimonio natural que atesouran. E non só iso: a Xunta levou a cabo unha estratexia de demolición controlada destes espazos, através das modificacións da Lei do Solo, do POL, do PDA, etc. que rematou finalmente cun Plano Director da Rede Natura para permitir nas zonas de maior valor ambiental, mesmo en Parques Naturais, piscifatorías, incineradoras, caza, rallys, recualificar solo rústico...