O 30 de xaneiro terá lugar na facultade de Aquitectura da Universidade da Coruña o Obradoiro de Caixas Niño organizado pola Oficina de Medioambiente (OMA) coa colaboración da asociación ecoloxista ADEGA. A actividade consistirá na construción de refuxios que lles poidan servir de acubillo e lugar de cría a moitas especies, en especial paxaros e morcegos, nestes duros días de inverno.

A xornada comezará ás 11 da mañá cunha pequena charla informativa a cargo de Ramsés Pérez de ADEGA e a continuación terá lugar o obradoiro no taller de maquetas da facultade de Arquitectura. Unha vez feitas as caixas procederemos a penduralas nas árbores do campus e posteriormente levaremos o seguimento das mesmas.

A tala dos bosques autóctonos e a substitución por monocultivos, así como a retirada das árbores vellas dos montes, ten entre outras consecuencias, a desaparición de multitude de buracos necesarios para que moitas especies de animais nidifiquen ou se refuxien. A construción de caixas niño e outros abrigos para a fauna (paxaros, mamíferos, anfibios...) contribúe a paliar este impacto favorecendo á biodiversidade.

Por outra banda a construción de refuxios contribúe a reutilización. Para elaborar unha caixa niño ou calquera outro refuxio non se precisan grandes investimentos, nin ferramentas sofisticadas, nin mercar madeiras que contribúan a tala de máis árbores. Con esta actividades podemos dar uso a unhas vellas táboas empregando a ferramenta habitual. 

Prazas limitadas a 20 persoas. Inscricións en: Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo .