17-04-2016
Unha vez máis, ADEGA-Lugo convoca a todo tipo de público a participar nun novo roteiro do ciclo de andainas pola natureza "Memoria Pétrea", que este ano está dedicado a divulgar e coñecer o patrimonio material máis antigo. Desta volta, acudiremos ao concello de Foz para coñecer o Castro de Fazouro, pero tamén fervenzas, fortalezas, camiños vellos, rías e praias. O próximo roteiro de ADEGA-Lugo celebrarase toda a xornada do domingo, 17 de abril.
A lonxitude do roteiro será de 13 quilómetros e a dificultade media-baixa.
O roteiro (lineal, continuo e andarín) discorre sucesivamente polas parroquias de Fazouro, Nois e Cangas, do Concello de Foz. Principiaremos a camiñar na fervenza da Pena da Ruxida, preto do Pazo de Fontao (s. XVII), en tempos unha das casas fidalgas máis sobranceiras da Mariña; percorreremos a senda arborada do Río Ouro (espazo LIC, con interesantes especies de fauna e flora, e vexetación riparia cada vez máis eucaliptizada) cara á súa desembocadura (após a igrexa parroquial de Fazouro e a Obra Pía de Vilarmea), na Ría de Fazouro e Praia da Pampillosa.
A partir de aquí seguiremos a liña de costa co Cantábrico sempre á dereita; en canto superemos os pendellos mariñeiros (“O Porto”), albiscaremos o castro litoral de Fazouro, verdadeiro referente deste roteiro; se a marea nolo permite baixaremos á Praia da Morneira ou Arealonga para observar os depósitos de turba que resultaron practicamente cubertos coa agresiva intervención de Costas no paseo litoral.
Despois de visitar o portiño, as vellas conserveiras e a igrexa parroquial de Nois, poderemos dar un paseo pola súa ribeira para comprobar a riqueza do intermareal, progresivamente minguada por mor da brutal invasión da alga “sargazo”.
Tras percorrer a recortada costa deste tramo, coa Pena Orxal ao fondo e o vento nordés ás costas, remataremos a ruta na igrexa parroquial de Cangas, coa posibilidade de alongala 1 km máis ata a praia da Areoura.
A reserva de praza debe realizarse, chamando ao local de ADEGA-Lugo (982240299) ou ao móbil (679113718) ou enviando un mail a adegalugo@adega.gal co teu nome completo e número de contacto.
Ollo!: Se queres facer a reserva despois do 14 de abril, só poderás facela a través do teléfono móbil; mais recomendamos que non agardes moito para solicitar a túa praza, xa que se farán reservas ata que se esgoten.
A SAÍDA do autobús terá lugar o domingo, 17 de abril, diante da Facultade de Profesorado de Lugo (antigo Maxisterio) ás 9 HORAS.
Se por algunha razón, as persoas que xa teñan reservado praza non poden asistir ao roteiro, prégase que avisen por teléfono coa máxima antelación posible para dar cabida a que outra xente participe.
Os prezos para a realización desta actividade son:
ADEGA / Asociación para a defensa ecolóxica de Galiza
Avenida de Castelao, 20-Baixo 15704 Santiago de Compostela
Tlf/Fax: 981 570 099 Email: adega@adega.gal
