28-02-2016
O vindeiro domingo 28 de febreiro, ADEGA-Lugo organiza outra andaina dentro do ciclo de roteiros "Memoria Pétrea" que durante o ano 2016 está dedicado á visita dos elementos patrimoniais máis antigos que aínda acolle o noso territorio.
Nesta vindeira ruta moverémonos entre os concellos de Samos e O Incio, na provincia de Lugo, para visitar dous Castros, o Formigueiros e o de Goo, e un petróglifo dos máis curiosos que coñecemos, o do Agro do Pepe.
O roteiro terá unha lonxitude de 15 quilómetros e a dificultade será media-baixa.
*Nota: No programa de roteiros "Memoria Pétrea" a realización deste roteiro estaba prevista noutra data, pero ADEGA-Lugo tivo que mudala para o 28 de febreiro por motivos alleos á organización. Sentimos as molestias.
Iniciaremos a xornada coa visita ao Castro de Formigueiros, poboado castrexo da idade de Ferro e localizado na parroquia homónima do concello de Samos. En bus, dirixirémonos ao Val do Mao e dende aquí iremos andando ata a aldea de Sobrado. Neste punto principia o singular labirinto de pedras e un acolledor souto. Despois de visitar a aldea de Santa Cristina camiñaremos ata a canteira de caliza na que en 1961 se atoparon os únicos restos de Mamut localizados de momento en Galicia. Estes restos foron estudados e postos en valor polo científico Isidro Parga Pondal.
Posteriormente, subiremos ao Castro de Goo. Remataremos o roteiro baixando cara a Lebaste e Mosteiró, ás beiras do encoro de Vilasouto. Neste lugar contemplaremos o Petróglifo do Agro do Pepe no que se representan singulares figuras (como se mostra na imaxe).
Durante o percurso, acompañaranos un guía de excepción, Luis Díaz, socio de ADEGA e gran coñecedor da zona.
A reserva de praza debe realizarse, chamando ao local de ADEGA-Lugo (982240299) ou ao móbil (679113718) antes do venres 26 de febreiro.
Faranse reservas até esgotar prazas!
A SAÍDA do autobús terá lugar o domingo, 28 de febreiro, diante da Facultade de Profesorado de Lugo (antigo Maxisterio) ás 9 HORAS.
Se por algunha razón, as persoas que xa teñan reservado praza non poden asistir ao roteiro, prégase que avisen por teléfono coa máxima antelación posible para dar cabida a que outra xente participe.
Os prezos para a realización desta actividade son:
ADEGA / Asociación para a defensa ecolóxica de Galiza
Avenida de Castelao, 20-Baixo 15704 Santiago de Compostela
Tlf/Fax: 981 570 099 Email: adega@adega.gal